ONGWEDIVA- Omukulunhu wouhaku ta kwafele moshitukulwa shaHangwena George Jeremiah okwa ti ombelewa yavo youhaku otai shi endifa nawa okulwifa malaria molwashi paife omivalu dovanaudu vomukifi ou oda shuna pedu.
Okwa ti ombelewa yavo youhaku oya tameka okutopolela ovanhu ngaashi ovanahambo noshoyo oshiwana shovayelele eenete deemwe.
“Elalakano lokutameka okuyandja eenete koshiwana shovayelele oshe shi osho unene sha didilikwa shi li momhumbwe yeenete mwa kwatelwa ovanahambo,” ta ti.
Okwa yelifa ta ti eenete ota di ka pewa ovanhu aveshe ve li momhumbwe opo kukelelwe etandavelo lamalaria.
Jeremiah okwa ti ombelewa youhaku mOhangwena oya tuma ovanambelewa voundjolowele komikunda da yooloka opo va ka yandje ehongo nouyelele kombinga yamalaria.
Onghee okwa ti eshi otashi ulike efano liwa kutya oshikondo shouhaku mOhangwena oshe li tulamo nokulonga noudinini okukondjifa malaria moshitukulwa.
Okwa didilikwa omikunda di li kombinga yokeengamba odo dimwe da didilikwa ku na ovanhu vahapu va monika oshidu shamalaria unene tuu ovakwashiwana Ovaangola eshi have u ya okukonga omayakulo opauhaku moshilongo.
Okwa kumaida oshiwana opo shi longele kumwe novanailonga vopombela ngeenge tava pula vaye momaumbo avo.
“Osha fimana ngeenge meenduda ta mu twimikilwa omiti opo ku kelelwe etandavelo lomalaria,” ta ti.
Okwa ti ovanhu ve na omadidiliko oshidu malaria nava lopotwe pefimbo opo va pewa epango lopaunamiti.
Okwa kumaida oshiwana opo shi kaleke po eenhele davo da yela efimbo keshe, novadali opo va kwashipaleka kutya ounona vavo ove li mefiloshisho lokukala va tuvikilwa meenete dokukelela eemwe.