Omulumenhu weedula 19 okwa fya konima eshi vati a dengwa neengonyo kumumwainamati weedula 21.
Oshiningwanima eshi osha ningwa oshivike sha dja ko komukunda Ohadiwa koshitukulwa shaHangwena efimbo loufiku.
Nakufya okwa tongololwa oye Kotokeni Mwatilile omukalimo womomukunda Ohadiwa.
Omukulunhu koshikondo shokukonakona oimbuluma wopolifi moshitukulwa shaHangwena omupedu Commissioner Zachariah Amakali okwa hokolola ta ti omufekelwa okwa li e na eendjo doimaliwa daMwatilile.
Naashi osha ka eta olwoodi pokati kovalumenhu ava shaashi okwa li tava tanguna.
Opolifi oya hokolola tai ti omufekelwa okwa nukila Mwatilile ndele te mu denge neengonyo nokumulyata moshipala.
Nakuninga oshihakanwa okwe lidenga po nokonima okwa twalwa koshipangelo shaShakati opo a ka mone epango lopaunamiti. Opolifi oya hokolola tai ti omulumenhu okwa fikila kosaala yo-ICU molwaashi okwa li a monifwa oshiponga neenghono.
Otaku hokololwa kutya nakuninga oshihakanwa okwa xulifa Etitatu efimbo longula. Opolifi oya hokolola tai ti omufekelwa okwa ya koWindhoek konima eshi a longa oshimbuluma.
Okwa kwatwa po pefimbo e li koWindhoek konima eshi opolifi ya longela kumwe noshiwana. Otaku hokololwa kutya omufekelwa ota holoka momhangu yaHangwena nena. Omufekelwa ota pangulilwa oshibofa shedipao. Opolifi oya kumaida oshiwana opo shi longele kumwe mokulwifa omahepeko omomaumbo. -fhamalwa@nepc.com.na