Inspector Anna Kunga wokoshikondo shopolifi shokuyandja ouyelele moshiwana moshitukulwa shaMusati okwa kumaida ovadali opo va kotokele ounona pefimbo eli lodula, efundja noshoyo okukangheka nokufiya poluhaela omavela e na omeva noikunguluki ikwao.
Omudo wa dja ko, mOmusati omwa li mwa fya ovanhu ve li 15 pokati kaJanuali na Febuluali. Neudo, mOmusati omwa lopotwa omunhu umwe a fya momeva, mOhangwena vavali, nomOshana vavali okudja petameko laJanuali.
Kunga okwa ti ounona vanini vo ova ninga oihakanwa yokuwila momavela omeva shaashi luhapu ovakulunhu ohava fiye va kangheka omavela omeva poluhaela nomomaumbo mu na ounona vashona.
“Omavela omeva naa kale a tuvikwa efimbo keshe. Ounona inava fiwa vali momaumbo ile tava i keendobe domeva vehe li metonatelo lovakulunhu,” Kunga ta ti. Okwa weda po ta ti unene tuu pefimbo eli lefundja li li moshitukulwa shaHangwena ovadali nava kale alushe tava tonatele ounona ngeenge tava i ile tava di keefikola noshoyo ngeenge tava lifa opo ku kelelwe ounona vaha ninge oihakanwa yokufila momeva.
“Ovadali nava popye nounona navo opo vaha danene omeva. Ounona nava lombwelwe kutya omeva okwa nyika oshiponga,” ta ti.
Neudo moshitukulwa shaMusati okwa lopotwa okaana kamwe ka fya omeva eshi kawila mevela omanga moshitukulwa shaHangwena omwa lopotwa vavali va fya eshi va wila momatale.
Okaana ke na odula neemwedi nhano oka fya eshi vati ka wila mevela lomeva pefimbo kwa li taka kendabala okunwa omeva momukunda Okafakoushongo moshitukulwa shaMusati.
Vati ovaneumbo okwa li veli mepya pefimbo loshiningwa onghee okaana oke li tuwa komuneumbo umwe eshi kwa li aya meumbo noku hanga okaana ka fya.
Okaana kokamati keedula nhano Twamwenwa Joseph oka fya eshi kawila metale lomeva pefimbo kwa li taka danauka namukwao naye weedula nhano.
Oshiningwanima eshi osha ningwa oshivike sha djako momukunda Ondeihaluka mOhangwena.
Opolifi oya hokolola tai ti nakuninga oshihakanwa eshi a wila metale mukwao ou kwa li veli naye okwa ka lopotela ovakulunhu kutya okwa wila metale ashike okwa hangika nale a fya.
Okaana kokadona keedula 10 nako oka fya eshi kawila metale pefimbo kwa li tava kwata eeshi navakwao Omaandaxa momukunda Omungwelume.
Nakufya okwa tongolwa oye Lucia Ndapandula Nghinananye omukalimo womOmungwelume.
Oshiningwanima shikwao, okaana keemwedi nee vati oka fya eshi ka dipawa kuina naxe ndele tava kafudike momaendo.
Oshiningwanima eshi osha ningwa omudo wa djako muNovomba kodoolopa Karasburg moshitukulwa shaKaras.
Omukonakoni woimbuluma wopolifi omupedu Commissioner Nicodemus Mbango okwa hokolola ta ti ovadali vokaana ova kwatwa po konima eshi ovashiinda noshoyo omunailonga womeumbo va lopotela opolifi shaashi okaana ka yongolwa meumbo oule womwedi.
Vati eshi ovadali vokaana tava pulwa kutya okaana oke li peni ova nyamukula kutya ove ka twala kowambo.
Onghee okudja opo opolifi oya kala nokuninga omakonakono fiyo ouyelele ta uya kombada.
Oshiningwanima shikwao, omukainhu weedula 25 okwa fya eshi vati a dengwa komulumenhu waye fiyo omefyo komukunda Gwashikololo moshitukulwa shaMusati.
Nakufya okwa tongolwa oye Evone Fillipus omukalimo womomukunda Gwashikololo.
Opolifi oya hokolola tai Fillipus okwa li tava tanguna nomufekelwa waye meumbo nokonima omufekelwa okwa tameka okumudenga.
Omufekelwa okwa faduka po konima eshi a longa oshimbuluma onghee opolifi oye li pyakidila noku mu konga.
fhamalwa@nepc.com.na