Opolisi yaNamibia oya ti, mboka taya ka mona niizemo yili nawa ,uukonaakono wopetameko nosho wo momakonakono guunamiti, otaya ka tameka omadhewo gopolisi muJuli nuumvo.
Omupopiliko gwopolisi yaNamibia Deputy Commissioner Kauna Shikwambi okwa ti, omakonakono ngoka oga simana na omo hamu pitile kehe gumwe ngoka ta taambwa mopolisi.
“Ayehe taya piti mo otaya ka ningilwa omakonaakono gopaunamiti opo ku tali ke mpoka ya thikama paukolele nopanteyo ko ku tokolwe ngele otaya vulu tuu shili omadhewo gopolisi,” ta fatulula ngaaka.
Shikwambi okwa ti, oya simaneka uuntu womuntu, onkene omakonaakono nokuminikila komalutu gaantu hoka otaku ningwa nesimaneko, uuna ya gandja e pitikilo yo yene.
“Ndhoka omilandu dha tulwa po sha ikolelela ko kompango, nodhi na okusimanekwa ku kehe gumwe,” ta popi ngaaka.
Shikwambi okwa thindi omuthindo opo oshigwana shi kotokele ookalyamupombo mboka taya ti otaya dhenge okuza koombelewa oonene dhopolisi koWindhoek taya gandja omayakulo gaa mboka taya ndopa okugwanitha po ayihe tayi ka pulwa.
“Anuwa otaya lombwele aantu kutya otaye ya pititha nomikalo omiwanawa, opo yaa e nde nomilandu adhihe dha tulwa po. Oshoka anuwa oyo yeli moombelewa dhopombanda, notaya futwa ahike oshimaliwa okuza N$800 00,” ta hokolola ngaaka.
Ta ti opolisi ihayi pula iimaliwa, ihe ohayi landula omilandu dhopambelewa.
– vkaapanda@nepc.com.na