Omulumenhu womunadolongo weedula 34 okwa kwatelwa moshipangelo konima eshi kwa li a monifwa oshiponga kovanadolongo vakwao.
Otaku hokololwa Petrus Hauwanga a teka eemhati nokwa mona yo oshiponga komutwe nokofingo pefimbo lolwoodi olo la tukuka modolongo.
Oshiningwanima osha ningwa koshitaashi shopolifi shokOhangwena oivike ivali ya pita po.
Omukulunhu koshikondo shokukonakona oimbuluma shopolisi moshitukulwa shaHangwena omupedukomufala Zachariah Amakali okwa hokolola ta ti ovanambelewa vopolifi ovo kwa li ve li moilonga efiku olo ova uda ashike Hauwanga ta kuu kouyehame, naashi va ka fika konduda ova hanga Hauwanga e li mekungu lohonde.
Amakali okwa hokolola ta ti omunadolongo ou okwa twalwa koshipangelo opo a ka mone epango lopaunamiti.
Okwa ti konima eshi Hauwanga a lekelwa moshipangelo okwa twalwa koshitaashi shopolifi kOmungwelume nelalakano lokulundulula ko ku kelelwe olwoodi la wedwa po pokati kovanadolongo ava.
Hauwanga paife okwe litulilwa monduda yaye yokunangala molwaashi natango ina ve luka.
Amakali okwa ti ovadolongo vavali ovo taku fekelwa kutya ovo va ehameka Hauwanga, ova patululilwa oshibofa shokudenga nelalakano lokuehameka olutu.
“Oonakudenga Hauwanga okwa li va holoka momhangu. Oshibofa shaye osha undulilwa komesho omanga taku ningwa omakonakono,” ta ti. Okwa ti oshikumungu shovadalongo tave lidenge oshi li eshongo linene la taalelwa koitaashi yopolifi.
Okwa hokololan ta ti opolifi alushe ohai popi novadolongo opo va lopotele ovanambelewa vopolifi ngeenge pe na olwoodi.
“Ovambelewa vopolifi ove lilongekida alushe okuyambidida ovanadolongo ngeenge tava dengwa. Kape na omunadolongo a pitikwa okudenga mukwao,” ta ti.