Festus Hamalwa
Minista wounamapya, omeva nomatulululo omadu Calle Schlettwein okwa ti ouministeli waye otau twikile nokukala wa andjaneka omeva moshiwana shaashi eshi oshi li oshinakuwanifa shepangelo shotete.
Okwa ti osha fimana ngeenge ovanhu ve na omeva opo va kale tava longifa momaumbo, okunwefa oimuna yavo noshoyo okukufa ombinga moinyangadalwa younamapya.
Minista okwa ti oshilongo itashi xumu komesho ngeenge ovanhu kave na sha omeva shaashi omeva ohaa longifwa pamikalo dihapu odo hadi dulu okuhambula po eliko loshilongo ngaashi oinyangadalwa younamapya noshoyo ounafaalama woimuna.
Edi Schlettwein okwe di popya kepatululo lokanaala oko kwa li taka tungululwa pokati kOmahenene nOlushandja moshitukulwa shaMusati Etitatu.
Minista okwa ti elalakano lokulongulula okanaala okukandula po omhumbwe yomeva moitukulwa ngaashi Omusati, Oshana, Oshikoto nOhangwena ei hai mono omeva okudilila mokanaala.
Okwa yelifa ta ti okanaala oka kwatafana okudja komulonga waCunene k ndama ya Calueque moAngola, onghee elalakano opo okanaala ka kale ke na omeva a wana okuandjanekwa mominino dihapu.
“Ouministeli wounamapya otau twikile nokuyambidida ehangano loNamwater opo li kwashipaleke kutya oshiwana osha mona omeva a wana,” minista ta ti.
Minista okwa weda po ta ti oitukulwa yomonooli oya kala ya taalela eshongo linene lomeva taa ende kashona monino shaashi okanaala kakwa li taka dulu vali okuandjaneka omeva mahapu.
Onghee okwa ti naashi osha eta opo ouministeli u kale wa longulula okanaala opo omeva mahapu a kale ta andjanekwa noupu.
Schlettwein okwa kumaida oshiwana opo shi kale tashi longifa nawa okanaala noshoyo ovakulunhu opo va kale tava tonatele ounona vavo kava ninge oihakanwa yokuwila mokanaala.
Eshi a kwatafana naKundana Veronica Tjimbudha omukalimo womomukunda Omahenene okwa ti itava ka kala vali ve li momhumbwe yomeva shaashi paife okanaala otaka kala ke na omeva mahapu okudilila moAngola.
“Paife ohatu kala hatu teke omeva noupu shaashi okanaala okatungwa ke na onhele opo hatu kala hatu tekele noupu onghee eshi oshi li eameno,” ta ti.
Anelly Mulamba oku na oshikunino momukunda Omahenene nokwa hokolola ta ti paife ita kala vali e li momhumbwe yomeva yokutekela oimeno yaye shaashi paife mokanaala omu na omeva a wana.
fhamalwa@nepc.com.na