Victoria Kaapanda
Opolisi moshitopolwa shaShana oya manga po omupolisi gumwe sho a li ta hingi e li kohi yiikolithi mehuliloshiwike. Omugandji gwomauyelele gwopolisi moshitopolwa shaShana Thomas Aiyambo okwa ti omunamimvo 47, ngoka ha longo koshikando shokulwiitha iimbuluma okwa taalela iipotha iyali, okuhinga nuuhasha oshowo okuhinga e li kohi yomalovu.
Otaku hokololwa kutya omupolisi ngoka okwali a pumu iihauto iyali mbyoka kwali aadha mopate, momundhingolko gwOshakati. Opolisi oya ti, okwa li a pumu tango ohauto yoPolo Vivo ihe natango ta tsikile oku ka puma ohauto yoToyota Corolla ndjoka kwali tayi hingwa meni lyomusinda.
Opolisi oya ti, ohauto yomupolisi ngoka okwa li ya zi mo mondjila yopate sigo ya pumu egumbo ndyoka lyi li pooha dhopate, naampoka pwa pumwa, ekuma okwa li lya gu po.
Ya gwedha po kutya ohauto yomupolisi ngoka okwa li ya mono oshiponga komeho, ihe kape na nando omuntu gumwe a mono oshiponga.
Nonando aapolisi ya kala nokukumagidhwa kaaya longe we iilonga inaayi uka oshoka oyo ye na okukaleka po elandulathano onkene taya tsikile.
Opolisi yaNamibia onkene tayi tsikile okukumagidha aapolisi ya kale ye li kokule niinigwanima tayi shundula iilonga yawo, omanga oyo yena okukwatela po elandulathano.
Tayi gwedha po kutya ngele mboka ye na okutula po elandulathano oyo taya teya po oompango ndhoka dhi na okusimanekwa, aakwashigwana otaya ka gwanitha po oompango ndhoka ngiini.
Ya gandja oshiholelwa kutya, omukuluntu ngele ota longo iilonga inaayi uka megumbo, komeho gaanona, nena aanona mboka nando ya gandwe kaye na esiku ya simaneke omukuluntu gwawo.
Opolisi oya ti, esimaneko ohali kala po uuna mboka taya kwatelepo oompango, nayo taye ndhi simaneke noku dhi gwanitha po. Opolisi oya kala nokulopota iiningwanima tayi ningwa kaapolisi oshilongo ashihe, mwa kwatelwa mboka taya yaka iinima ya mangwa po okuza moshigwana, okutaamba oombumbo nosho tuu.
vkaapanda@nepc.com.na