SWAKOPMUND – Iikolokosha yi na sha nofaabulika yiilongwa mo ya za koombwa domomeya oya umbwa mo momusholondondo wiikumungu mbyoka yi na oku uvika mompangulilo.
Omukwashigwana waChina Charles Jiang okwa li a tula mo eindilo opo oshikumungu she shi ye miihokolola konima sho opolisi yaNamibia ya kwatele po iilyo yiivalitho yoombwa dhomomeya ashike mEtitano lyazi ko, omupanguli Hannelie Prinsloo okwa tindi opo iihokolola mbyoka yi ye komeho.
Iilyo mbyoka oya li ya kuthwa ko kuInspector Felix Ndikoma, ngoka e li oshilyo shetanga lyopolisi tali ithanwa Blue Rhino Task Team, li lile po oku konaakona iimbuluma hayi ningilwa iiyamakuti moNamibia. MuJanuali gwunuumvo, etanga ndika olya li lya handha ehala lyomapungulilo koSun Industrial Park, Lafrenz, moWindhoek hoka kwa adhika ookilongalama 217 dhiilyo-valithi yoombwa dhomomeya yakukutikwa.
Omapungulilo ngoka anuwa ohaga longithwa kehangano lyoSeal Products nolyoolden Lion Investment, agehe gaHou Xue Cheng. Otaku tiwa Cheng oye omunambelewa omukuluntu woSeal Products ye oye ishewe e na iipambuliko oyindji moGolden Lion Investments.
Metungo moka omwa li wo mwa adhika iilongomwa niilyo yilwe yiiyamakuti oyindji ngaashi omayego goondjamba, iipa nosho we ooholo.
Cheng okwa li a kwatwa po noku patululilwa oshipotha shoku kala niilyo yiinamwenyo ya gamenwa, shoka shi li kohi yOkatendo okati-9 komo2008. Oshipotha shoka sigo onena oshi li kompangulilo yaMangetalata gwaKatutura.
Iilyo yiivalitho yoombwa dhomomeya oyo ya kutha Jiang moondambo a ye kompangu opo eyi galulilwe.
Jiang anuwa okwa hala ompangu opo yi tokole kutya ekuthoko liilyo yoombwadhomomeya kali li paveta.
“Omuningi gweindilo okwa hala okugalulilwa iinima ye. Okwe pumbwa wo oku ndhindhilikwa kutya opu na epatathano kombinga yomuyalu wiipakete mbyoka ya kwatwa ko.
Omutulimo wiihokolola ota ti okwa hala iipakete ye yili 510, omanga Ndikoma ta ti ye okwa kwata ko owala iipakete yili 39, mbyoka yi na uushako uushona wuli 382 notayi vihi o217.1kg dhiilyo yakukutikwa,” oombapila dhompangu tadhi ti.
Ndikoma kombinga yimwe ota ti Jiang ke na uuthemba woku tula moshipotha oshoka okwe shitula mo keena epitikilo lyaanashipundi yehangano lye. Ishewe,
Jiang iha longele oSeal Products. Ishewe, omukalelipo waJiang wopaveta ina ulika kutya Jiang oku na uuthemba wopaveta woku kalela po Seal Products kompangu.