Omukiintu omugundjuka ngoka ta tyapula uuwanawa woshikunino she okwa ti nonando a kala ethimbo pevi kee na mpoka ta kutha iiyemo yokwi iyambidhidha, omasiku osho ga thikana.
Annely Shaanika gwomomukunda Oshitutuma moshitopolwa shaMusati okwa ti oshikunino she otashi mu yambidhidha noonkondo, nonando ta tsakaneke ngaa omashongo.
“Ondjala kandi yi shi we, oshoka iikwamboga kehe omo yili moshikunino shandje, oshowo oshimaliwa otashi ende ethimbo alihe,” ta ti ngaaka.
Ta hokolola kutya okwa li a tameke oshikunino she omimvo ndatu dha piti, ihe nena ota li ti itapula.
Shaanika ta ti ye omuhona kuye mwene, ye ke na we nando ehalo lyokulongela omuntu oshoka oshimaliwa okushi sho hashi longwa.
“Otandi kumagidha aanyasha aakwetu kutya kape na oshimaliwa oshitoye sha fa oshimaliwa shongeshefa yoye mwene, thikama nena,” ta kumagidha ngaaka.
Uunafaalama moshitopolwa shaMusati owa gandja oompito dhiilonga kaakalimo oyendji, omunafaalama Lydia Emvula gwomomukunda Ongali ta hokolola.
Konyala aakalimo oyendji mOmusati oye na iikunino pomagumbo omanga yamwe ye na iikunino iinene opo ya wape ya landithe ya mone mo iiyemo. Emvula okwa gwedha po ta ti, ompito ndjika oya nyanyudha aakalimo oyendji yomoshitopolwa shaMusati, oshoka oya kutha oyendji momapaandaanda.
Aanafaalama oya eta mo iilongwamo oyindji naambyoka kaaya li mo nale moshitopolwa,” ta hokolola.
Kakele kokuandjaneka iikulya moshitopolwa, okulanditha iilikolwamo otaku humitha eliko lyoshitopolwa komeho.
“Konima iilonga yandje ya pupo, okwa li nda tameke noshikunino shandje mo2018, ihe sho te popi ngeyi, oshimaliwa handi mono komwedhi oshi vulithe shoka kwali handi mono miilongo,” ta fatulula ngaaka.
Emvula okwa pandula wo aanafaalama aakwawo ta ti, otaya etitha oonkondo lela nohaya longo nuudhiginini, unene mboka yi iyamba okutameka uunafalama wiikwamawawa mboka tawu vulu natango okugandja Iilonga koyendji.
“Ta ti oshikunino kashi shi oshipu, ihe osha pumbwa ashike eitulemo nohole, ngele owa hala okusindana,” ta kumagidha.
Ta gwedha po ta ti, kape na iilonga kaayi na omashongo, ihe ngele owi itula mo otoka teya shoka wa kuna.
Emvula okwakumagidha oshigwana kaashi kale sha tala ashike koshipala shepangelo ashike naya longe kuyo yene, ya vule okugandja iilonga moshigwana.
vkaapanda@nepc.com.na