Aakalimo yomOshomeya pamwe nengungo lyaanasikola ya za koosikola dha yooloka mOshomeya oya gongala posasiona yopolisi yaNomtsoub, mpoka ya tameke osheendo shokudhimbulukwa esiku lyo ku kondjitha elongithi lyiilongithomwa yo tobacco. Osheendo okwa li sha kwatelwa komeho kaanambelewa yoposili osho wo aanambelewa yondholongo sigo okokapale komaudhano kaOscar Norich.
Aanamibia oya gongala momwaalu omunene mOshomeya opo ya waimine uuyuni mo ku Namibians dhimbulukwa ekondjitho lyiilongithomwa yo tobacco ndyoka ha li dhimbulukiwa aluhe momasiku 31 May omumvo kehe.
Pethimbo meya gwondoolop yaShomeya Mathews Hangula a patulula pambelewa oshituthi shika, okwa popi nkene oshituthidhaimbuluko shi sha simana mo ku patulula euveko lyaantu kombinga yoshiponga sho ku nwa omakaya oshowo iilongithomwa yilwe yo tobacco.”Otu na oshinakugwanithwa sho ku gamena aanyasha yetu komakoto ngoka ha ga longithwa komahangano ha ga longo iilongithomwa yo tobacco”, osho meya a gwedha ko ngaaka.
Omupeviminista gwuundjolowele nomayakulo gopaunamiti Esther Muinjangue, okwa pandula ehango lyuundjolowele muuyuni, World Health Organisation, molwa eutulemo lyalyo mo ku yambidhidha Nambia mekondjitho lyiilongithomwa yo tobacco.
Okwa ti, oongeshefa ha dhi landith iilongithomwa yo tobacco oha dhi longitha omikalo ta dhi hokitha aanyasha iilongithomwa yadho, dho odhe shi ninga oshipu oku mona iilongithomwa yadho ngaashi omakaya, oohabili, omakaya gopashinena ha ga ithanwa e cigarettes, oshowo iilongithomwa yadho yilwe”. Muinjangue okwa londodha aanya yaa kengelelwe komakoto goosheshefa dhiilongithomwa yo tobacco, oshoka iilongithomwa ayihe yo tobacco oyi na oshikwauzigo ha shi ithanwa nicotine shoka sha ninga oshipinga kuundjolowele womuntu.
Oshituthidhaimbuluko osha tsikile nomainyanyudho geetwa po koosikola dha yooloka dho mOshomeya, nashimwe kwa li sha hokitha aatali unene oshinyandwa sheetwa po kongundu yo ku dhana iinyandwa ha yi ithanwa Arts Performing Center. Oshinyandwa osha li kombinga yomumati omugundjuka ngoka a si sheetwa ko ku nwa omakaya. Osha longo wo aanyasha ya kokele omanwethe mo ga puka.
Ndohotola kwa li a kutha ombinga moshinyandwa okwa ti, “Omaiyuvo ngoka ha ga etwa ko ku nwa omakaya oga faathana thilu naangoka ha ga etwa ko ku pulamena ko musika”.
Omundohotola Sofia Ashipala ngoka kwa li ta popile ko ehango lyuundjolowele muuyuni okwa ti iilongithomwa yo tobacco oha yi dhipaga aantu ye li lwopoomiliyona 8 muuyuni omumvo kehe. Okwa ti aantu ye li oomiliyona 7 oha ya si molwa oku longitha iilongithomwa yo tobacco yo yene, omanga ye li omiliyona yimwe oha ya si ha shi etwa ko ku fudha mo olwithi lwiilongithomwa yo tobacco. “Omuhingo gwoshituthidhaimbuluko nonuumvo ota gu ti, “Oku gamena aanona komakoto goosheshefa dhiilongithomwa yo tobacco”, osho Ashipala a popi ngaaka.
Omupopi gwomatsomumo Herbert Mukosho Shikongo okwa kutha ompito opo a longo aanyasha kombinga yoshiponga sho ku hila omakaya oshowo iilongithomwa yilwe yo tobacco. Okwa londodha kutya oku nwa omakaya ota shi vulu okweetala omuntu ehalo lyo ku longitha iingangamithi.
“Onda tameke oku nwa omakaya sho nda li ndi na ominvo 14, nokonima yethimbo sho omakaya ina ga uvithandje we nawa onda tameke oku nwa omapangwe, elago enene onda ka mona ekwatho ndele ta ndi etha thilu oku nwa omakaya nomapangwe”, Shikongo ta ti.
mrndeumaneraycharles@gmail.com