Omuresident Nangolo Mbumba okwa ti aagundjuka oye na oshi nakugwanithwa shoku eta omalunduluko omawanawa noye na oku shi ninga paku eta po uupokati wuli nawa pokati kehumokomeho neshonopeka lyelunduluko ewinayi lyonkalo yewangandjo, niinima mbika oya pumbwa okukaleka po uulinawa wefuta.
Pethimbo a li ta popi mesiku lyoku tyapula ekalo po lyefuta muuyuni, Mbumba okwa ti oku kala kwaNamibia pooha neduta okwe mu kwatha opo a tyapule omauwanawa haga zi mefuta ngaani ekwato lyoohi nomauwa ogendji ngoka haga zi mefuta nohaga eta mo oopelesenda ntano dhiiyemo hayi zi miilongwamo yomoshilongo mbyoka yi na ongushu yoobiliona N$10 omumvo kehe nohayi eta po oompito dhiilonga omayovi. Ta ti efuta olyo limwe lyomoonzo dhoku eta iikulya moshilongo.
“Sho tashi uvitha nayi osho shoka efuta, ndjoka mwa talika kaantu oyendji onga onzo yuuhupilo, oli li moshiponga molwa elunduluko lyonkalo yombepo ndjoka tali etwa kaatu,” Mbumba ta ti.
Ta ti eilundo pombanda lyefuta, uululu wapitilila, ekakeko noonailona, neyako lyoohi mefuta oyo yimwe yomomashongo ngoka ga taalelwa kefeta.
“Onkene osha simana ngele ta tu kutha oonkatu dhomeendelelo oku shonopeka efudhilo mo lyoompepo dhuuzigo mewangandjo, pamukaalo wokushonopekwe iilonga kehe hayi vulu okukakeka ewangandjo nosho wo omundhingonoko,” Mbuma ta ti.
Omupresidente ta ti eliko hali zi momundhingonoko weyala olya thikama po moongundhi ndatu ngaashi ekalekopo lyomundhingonoko, eliko itaali tangauka nokalathano ya kwatela mo ayehe.
Ta ti osha simana ngele Aanamibia taya kaleke po efuta yo ya kale ke po oonkambandala adhihe dhoku li kaleka po, paku kelela iinyandhalwa ayihe mbyoka tayi vulu oku kakeka efuta.
“Nati dhimbulukweni kutya efuta kali shi omeya gowala, ihe olyo onzo yonkalamwenyo, olyo onzo yeteelelo ewanawa, nolyo omuyelo keliko lyoshilongo nokiilongo oyindji. Natu longele ni kumwe opo tu kale ke po efuta lyetu opo tu seni oshimpwiyu kutya onakwiiwa yaantu ayehe oya kwatelwa po,” Mbumba ta gwedha po.
Esiku lyefuta muuyuni nuumvo olya dhanwa koshi yoshipalanyolo ‘Oonkambandhala dhoku kaleka po efuta lyetu nonkaloyombepo’.
-Nampa