Ouministeli wouhaku owa koleka kutya omukifi wokakwenyenye owa tukuka momudingonoko waMaruru moshitukulwahoololo shErongo.
Momushangwa wa pitifwa Etine, ouministeli owa konaakona ovanhu 39 okudja muJanuali neudo. Mumaalisa omo mwa kolekwa omunhu wotete a monika e na okakwenyenye, osho sha eta opo pu ningwe omakonaakono a wedwa po. Aveshe ava va monika omukifi ovanafikola keepilimafikola.
“Aveshe ova kufwa ohonde, osho sha eta natango omwaalu u ye pombada. Okwa lopotwa ovanhu vahamano va monika omukifi oo paife, ve li pokati keedula heyali no12,” osho omushangwapitifi woministeli wa tya ngaho.
She likwatelela komilandu di na sha nekeelelo lomikifi, ngeenge kwa monika ovanhu vavali ilo ve dule po va monika omukifi wokakwenyenye, nena osho otashi lukwa onkalo ya naipala, onghee osho sha etifa Omaruru a lopotwe kutya omu na etukuko lomukifi oo. Owa popya yo kutya aveshe va monika omukifi oo ove li monghalo tai nuwa omeva.
“Okwa li kwa ningwa oshikonga moshitopolwa, omo ovanambelewa va tameka okukonga ovanhu ava va li mekwatafano naavo va monika omukifi, vo tava yandja yo nehongo kovahongwa novahongifikola komihandjo deepilima, osho yo momudingonoko opo ku ngabekwe etaandelo,” omushangwa osho wa yelifa.
Owa fatula kutya okakwenyenye omukifi hau taandele diva. “Ombuto ei ohai denge oifudifo, yo tai tandavele nolutu,” ouministeli wa shanga.
Owa popya kutya ava ve li moshiponga unene ounona ava inava tunhilwa, ovakainhu ve lihumbata inava tumhilwa.
“Ovakwashiwana otava indilwa va kaleke po oundjolowele, va kale kokule nomangungo unene momaumbo. Uuna omunhu ta ulike omadidiliko, na ye koshipangelo shi li popepi, ilo pokakilinika. Etukuko lokakwenyenye otali dulu okweeta omafyo, unene tuu mounona oushona inava paluka nawa,” oshjo ovanambelewa va pitifa.
-Nampa