Charles Ndeumane
Opolisi moshitopolwa shaShikoto otayi indile oshigwana shi yambidhidhe nokugandja uuyelele tawu dhitikitha aafekelwa miipotha iyali ya yooloka yuufuthi wiikulya yoshikukuta.
Iipotha iyali ya yooloka yuufuthi wiikulya yoshikukuta oya lopotelwa opolisi yaTsumeb oshowo opolisi yaShivelo, nasigo oompaka opwa kwatwa aafekelwa yatatu shi na sha niipotha mbika.
Sha ikolelela kuuyelele wepeko lyopolisi, omufekelwa moshipotha shokoTsumeb okwa pewa ompito yokwiifutila mo, omanga yaali moshipotha shokOshivelo inaya pewa ompito yokwiifutila mo.
Omukuluntu gwopolisi moshitopolwa shaShikoto Theopoline Kampolo-Nashikaku okwa ti opolisi nayi pitikwe yi ninge omakonakono miipotha mbika pwaa na uumbanda nenge omaimbo gasha.
Opolisi otayi indile aakwashigwana mboka ye na uumbangi miipotha mbika opo ya ninge ekwatathano nomupevi-kuluntu gwopolisi moshitopolwa shaShikoto Titus Ekandjo konomola yongodhi 0813248182.
Nashikaku okwa ti opolisi otayi ka pandula unene kwaamboka taya ka gandja uuyelele miipotha mbika.
Omupevikuluntu gwopolisi moshitopolwa shaShikoto Titus Ekandjo okwa ti iikulya ya yakwa po moTsumeb nongushu yayo inayi tseyika natango ashike omwa kwatelwa ooshako dhuusila wepungu, iipakete yomagadhi goku lya, oshowo iipakete yoohi dhomondooha.
Omanga iikulya mbyoka ya yakwapo kOshivelo omwa kwatelwa ooshako dhuusila wepungu dho26kg dhili 34, iipakete iyali yomagadhi goku teleka, iipakete iheyali yoohi dhomondooha, nooshako mbali dhomakunde omatiligane, nongushu yiinima mbika N$ 100 000.
Opolisi oya kunkilile aakwashigwana ya kale megundjilo manga opolisi
tayi ningi omakonakono miipotha mbika, naangoka ena uuyelele tawu vulu oku kwathela opolisi medhitiko lyaafekelwa nagandje uuyelele mboka kopolisi.
Nashikaku okwa kwashilipaleke kutya oshigwana ota shi kala nokutseyithilwa uuna pwa holoka uuyelele uupe miipotha mbika. –mrndeumaneraycharles@gmail.com