Charles Ndeumane
ONGWEDIVA – Elelo lyondoolopa yOutapi olye shi pondola okugongela omwaalu gwoshimaliwa sho N$959 000 puulalelo wowina wokugongela oshimaliwa shi kwathele momalongekidho omaulikilo gopaipindi gOlufuko ngoka taga tameke moshiwike tashi ya.
Oshituthi shoka otashi ka kala ko momasiku 21 Juni sigo 2 Juli nelelo lyondoolopa olya pula omupresidente Nangolo Mbumba a ka ninge epatululo pambelewa lyoshituthi shika momasiku 29 Juni nolya tegelela eyamukulo okuza kombelewa yomupresidente.
Omupopiliko gwelelo lyondoolopa yOutapi Julia Shaanika okwa lombwele Kundana pethimbo lyoonkundathana kutya aapopi ya simana koshituthi inaya tseyithwa natango ashike patolona gwolufuko omukokolipresidende gwaNamibia Sam Nujoma omo ta ka kala moshituthi. Shaanika okwa ti omalongekidho otaga ende nawa nelelo lyondoolopa olyi ilongekidha okutaamba ko aantu ayehe mboka taya ka ya kOlufuko.
Amushanga omukuluntu gwoSwapo Sofia Shaningwa, omupeviminista gwomauyelele, omakwatathano gopaungomba Modestus Amutse, omupeviminista gwehumokomeho lyoondoolopa nomikunda Evelyn Nawases-Taayele, omukalelipo gwaChina moNamibia Zhao Weiping, oshowo ngoloneya gwoshitopolwa shaShikoto Penda yaNdakolo oyo yamwe yomaaleli mboka ya li kuulalelo.
Oshituthi sholufuko ohashi ningwa omvula kehe opo ku kwatelwe po nokusimaneka omithigululwakalo dhAawambo, ashike okwa li sha yiwa moshipala komukithi gwoCovid-12. Shika oshikando oshitimulongo oshituthi sholufuko tashi ningwa kelelo lyondoolopa yOutapi.
Aafuko ye li 60 ya za komithigululwakalo dha yooloka dhAawambo oya tegelelwa ya ka fukale moshituthi shika.
Aanangeshefa yiikulya niikunwa yeli 90 oya tula mo omaindilo opo ya ka ngeshefe iilandithomwa yawo ashike aanangeshefa owala 60 taya ka pewa ompito yok u landitha iikulya niikunwa.