Paulina Ndalikokule
Eyishangitho lyokugandja omikanda nokundhindhilika ootaksi nomanomola omanene ndyoka lya li lya tokolwa kuMuni gwaShakati itali kaningwa we.
Omupopiliko gwondoolopa yaShakati Katalina Kamari okwa ti oya lombwelwa owala ya dhimeko etseyitho ndyoka lya li tali hiya omaishangitho ngoka, no kaye na sho taya ti kombinga yoshinima shoka.
“Kuume oshiima shoka osha kalekwa kaanapolitika, kandi wete aanambelewa ye na mo sha moshinima moka. Oopolitika dhomahangano gootaksi ihadhi pu,” omunambelewa gumwe melelo ta ti ngaaka.
MOmaandaha elelo olya li lya tseyitha nokuhiya aahingi yootaksi ayehe yi ishangithe opo ya vule okukala taya felefula mondoolopa yaShakati shi ikolelela koompango dhelelo osho wo oompango dhondjila niiyenditho .
Okwa li ya tokola okupa kehe otaksi onzapo yeyishangitho yomvula yimwe opo yi fule okufelefula, omushangwa gwetseyitho tagu ti.
Aahingi oya li taya tegelelwa ye etele oombaapila dhawo dhokuhinga, omukandapitiko gokufelefula okuza koNaTIS osho wo onzapo yeshangitho lyohauto yo taya futu N$150 yomayishangitho.
Ootaksi okwa li woo tadhi ka pewa omanomola omanene ngoka tage dhi yoolola kiihauto iikwawo. Shoka aakwashigwana oyendji ya ka kala nokunyanyukilwa ooshoka oya itaala kutya otashi ka shunitha pevi iimbuluma yoyuwuga iinima mootaksi nenge okukwatwa po ombambyona.
Omukuluntu gwoNabta, gwehangano lyoombesa nootaksi, Pendapala Nakathingo okwa lombwele Kundana kutya etokolo ndyoka muni a ningi lyokuya moshipala omayishangitho ngoka olyi li mondjila.
Ta ti muni ina pula omagwedhelepo nokuninga omapekapeko gwana unene tuu okuziilila komahangano gootaksi osho woo aahingi yootaksi.
“Etokolo ndyoka ya ningi kali li pethimbo -inali adha, oshoka inaya pula omagwedhelepo, kape na iigongi ya ningwa naahingi yootaksi nenge natse (NABTA). Ondu uvile shimwe sha ningilwe ashike inatu hiywa. Ngele oto dhimbuluka ehangano lyetu olyo lya kala nokukondjitha opo ootaksi adhihe moshilongo dhi kale dha ndhindhilikwa nomanomola, ashike aantu oyendji kaya li ya hala,” Nakathingo a dhenge omuthindo.
Ta ti aantu naya takamithe kaya ninge omatokolo inaaga yela molwomvula yomahogololo.
Nakathingo okwa ti omaupyakadhi ge li po ogo ngoka kutya aahingi oyendji otaya tsikile nokuhinga kaaye na ombaapila dhokufelefula osho wo omikanda dhaa li pambelewa.
“Yamwe otaya hiilitha omikanda dhoka kiimaliwa oyindji, taya eta omanwethemo omawinayi. Noho omikanda ndhoka ohadhi pewa ashike aantu yamwe oohandimwe haya vulu okukala ye na nookuli dha thika pune tadhi hiilithwa ashike,” ta ti.
Aahingi yootaksi nuuseven sita oya kala nokunyenyata olundji kombinga yomikanda dhoka, taya ti ohadhi kwata ethimbo ele okumonika, yo mboka taya hiilitha oye na ondilo.
Aahingi yootaksi yamwe twa popi nayo oya holola omauvonai gawo shomuni a hulitha omashangitho ngoka manga inaga tameka.
“Omayishangitho oga li owala ge na okuninga oshoka okwa li taga kwathele okukutha mo mboka taya yaka opate taya mana po ookastoma dhetu, oshowo okukukutha mo mboka taya ningi omiyonena,” omuhingi gumwe a ti ngaaka.
MuNovomba omumvo gwa za ko okwa li kwa lopotwa omunasikola gokoUnam kOshakati ngoka anuwa a dhengelwe, ta yugwa niinima ye osho woo okukwatwa po ombambyona kaalumentu yeli yatatu ya li motaxi moka a londa mOshakati. Aafuthi mbaka oya li woo yad nhengele aavali yokakadhona ta ya pula iimaliwa opo yeka gandje.
Oshiningwanima shoka osho shimwe shomiimbuluma oyindji ha yi ningilwa aafalelwa mootaxi, aakiintu oyendji ngashingeyi iha ya kala yamanguluka okweenda mootaxi unene tuu ngele uusiku weya.
Eveline Shilongo omunasikola koIUM okwa ti okwa pondelwe nokuyakulwa ongodhi, iimaliwa, oka compiyuta ke osho woo ongaku okuya kosikola omutenya gwaankala.
“Omadhidhiliko ngono otaga ka kwathela opo tu kale tu shi kutya oyini otaksi naandjoka kaayi shi otaksi,” Shilongo a ti.