Minista womidingonoko, omaluxwa nomatalelepo okwa ti oungilingi otau dana onghendangala unene moNamibia eshi ovaleli vahapu vehe na oshisho noshiwana hava kala tava lipo oimaliwa noshoyo okulandifa po omadu.
Pohamba Shifeta okwa ti ovaleli paife kave va vali noshiwana, otava longele omadimo vo, tava tambula eembumbo.
“Kaleni mwa kotoka paife shaashi ovaleli otava longele ashike eefamili davo ponhele yokuyambida oshiwana tashi mono oixuna koluhepo,” Shifeta ta ti.
Shifeta okwa li ta popi nganga pefimbo loshivilo shoku yandja oilongifo kovanafaalama oyo ya yandja kehangano loEnvironment Investment Fund of Namibia, komukunda Omauni moshikandjohoolo shaKongo Etivali
Minista okwa ti ombelewa yaye oya didilika ovaleli vomupafyuululwakalo tava landifa omadu kombumbo koilimaliwa ihapu. “Edu pashiwambo oli na N$600. Ka pena mwene womukunda a pitikwa okulandifa ovanhu edu koshimaliwa shi li pomboda,” Shifeta ta ti.
“Onda lopotelwa kovanhu vahapu tava nyenyeta eshi va landifwa omadu kondilo kovaleli vopamufyuululwakalo.
Okwa ti omunhu ta lande edu la vakwa naye ombudi onghee okwa kunghilila oshiwana opo shi kale sha kotoka ngeenge tashi landifwa omadu a vakwa.
Okwa kunghilila ovanailonga hava moshikunino osho sha pewa omakwafo kehango loEnvironment Investment Fund of Namibia opo va twikile nokulonga noudinini onoshoyo oku kwata nawa oilongifo oyo va pewa.
“Ehangano e li otali lalakanene okushakeneka epangelo ondjilakati tashi pitile mokulwifa ondjala noluhepo noshoyo okueta po eemhito doilonga,” ta ti.
Okwa ti ovanyasha nava kufe ombinga moinyangadalwa younamapya opo va dule okulonga oikulya yavo vene.
Moshipopiwa Martha Kapembe wetonatelwa nhele omo muna oshikunino shavo okwa ti okwa pandula eshi va pewa oilongifo kehangano loEnvironment Investment Fund of Namibia shaashi paife otava kala tava longo nondjungu okuhambula po oshikunino shavo.
“Moshikunino omu na ovailonga vavali tava kalele noshoyo ovanailonga 65 vopakafimbo, onghee otashi yandje eemhito doilonga kovakwashiwana vomudingonoko wetu,” Kapembe ta ti.
Okwa weda po ta ti ove na omukuno shaashi ohava mono ovalandi vahapu hava di koitukulwa ya yooloka have uya okulanda oikunomwa yavo.