Omupopiliko wopolifi moshitukulwa shaKhomas Warrant Shipandeni okwa ti mexuliloshivike omwa lopotwa oibofa itatu yovakainhu va kwatwa onghonga eshi kwa li tava nu omalodu nookaume kavo moWindhoek.
Shipandeni okwa hokolola ta ti ovakainhu ove hole okuya keendingosho ile komaumbo ovalumenhu opo va ka hafele pamwe tava nu omalodu eshi shi li osho hashi eta va longelwe ominyonena dopaixulo.
Okwa ti ouyelele woibofa aishe itatu yomakwatonghonga owa lopotwa kopolifi Etitatu.
“Konima yefimbo ngeenge omukainhu okwa kolwa ohashi eta opo omulumenhu e mu kwate onghonga,” ta ti. Omukainhu weedula 35 okwa kwa kwatwa onghonga kukaume kaye eshi kwa li tava nu omalodu naye moKhomasdal.
Vati nakuninga oshihakanwa okwa ufanwa komufekelwa opo e uye keumbo lavo va tokelwe tava nu omalodu. Okudja opo eshi omukainhu ou a kolwa okwa ka kofa nokonima okwa longelwa omunyonena wopaixulo. Omukainhu weedula 27 naye vati okwa kwatwa onghonga pefimbo kwa li a ka nwa omalodu keumbo lakaume kaye.
Opolifi oya hokolola tai ti konima eshi nakuninga oshihakanwa va mana okunwa omalodu okwa kala a hala okuya keumbo ashike omufekelwa okwa kala ta ti na nangale shaashi okwa li kwa toka.
Okudja opo omufekelwa okwa findikila omukainhu oo ashike vati eshi ve li mondjila omufekelwa okwa nukila nakuninga oshihakanwa ndele tai naye moixulo moixwa. Omukainhu umwe naye okwa kwatwa onghonga eshi kwa li a ka talela po kaume kaye keumbo lavo moDorado Park.
Vati omufekelwa ova tokelwa tava nu nomukainhu oo nokonima eshi kwa toka nakuninga oshihakanwa okwe mu lombwela kutya otai ilwa kukahewa kaye opo aye keumbo. Okudja opo omufekelwa okwe mu kondjifa opo vaye naye moixulo manga va telela kahewa kaye a fika. Shipandeni okwa ti ovafekelwa ina va kwatwa po natango shaashi opolifi oya pumbwa tete okuninga omakonako. Okwa kunghilila ovakainhu opo va kale alushe va kotoka ngeenge tava nu omalodu novalumenhu opo ku kelelwe va ninge oihakanwa yokukwatwa onghonga. Okwa weda po ta ti ovalumenhu na va kale va kotoka ngeenge tava nu omalodu novakainhu shaashi okwa didilikwa ovakainhu vamwe ve hole okulongifa omukalo wokulundila ovalumenhu kutya ova kwatwa onghonga konima ngeenge va dopa okuwanifa eudeko lonhumba. fhamalwa@nepc.com.na
Caption: Warrant Silas Shipandeni wopolifi moKhomas.
Efano: Otwe li pewa