Omulumenhu weedula 28 okwa fya eshi vati a ponokelwa nokutuwa neembele kookalyamupombo pefimbo kwali tava di komangeshefelo moAngola.
Oshinigwanima eshi osha ningilwa keengamba daNamibia naAngola kOshikango mexuliloshivike.
Nakufya okwa tongolwa oye Ernesto Hiliyefele omukwashiwana waAngola, ashike okwa kala omukalimo mOshikango omo a kala ha ngeshefele. Sergeant wopolifi mOhangwena Simeon Haufiku okwa hokolola ta ti Hiliyefele okwa li okwa hangika kovafekelwa tadi moAngola aka landele oinima yaye yokulandifa pefimbo a ponokelwa nokumutwa neembele kookalyamupombo managa a li meni laAngola. Okwa xulifila ponhele opo a twilwa nombele.
Opolifi oya hokolola tai ti natango tuu mefiku olo omukwashiwana umwe waAngola na umwe waNamibia ova nyekwa omaliko avo oo kwa li va ka landa moAngola. Ka pena ovafekelwa va kwatwa po moiningwanima aishe itatu.
Opolifi oya lombwela Kundana kutya Ovanamibia ohava nyenyeta kutya ova ninga oihakanwa yokudengwa noshoyo okunyekwa omaliko avo ngeenge va i moAngola vaka landa oinima yavo ile vaka nwefa omahooli.
Vati ngeenge va ningilwa omunyeka ihava lopota oipofa shaashi kave wete kutya otava lopota peni shaashi moAngola ohava i mo shihe eli patikilo eshi hava pi tile keengamba koshi yodalate. Molopota kwa li ya pitifwa kopolifi yomOhangwena oya ti oshiwana keengamba oha shi ponokelwa kovakwashiwana vaAngola hava kala ve li meengudu ve kwe te eembele noshoyo omakatana.
Omunamibia umwe okwa hokolola ta ti paife ina va manguluka vali ngeenge ve li keengamba ile tava i moAngola shaashi ohava kala alushe va tila okudengwa, okunyekwa omaliko avo noshoyo eetuwa davo dilemanekwe nomamanya.
“Ame ohandi ka tala omalodu ouWhiskey moAngola ha di pitile koshi yodalate ashike ngeenge ndi li mondjila oku alukila mOshikango ohandi shakeneke nongudu yovalumenhu vaAngola tava ningile nge omatilifo kutya nandi va pe oinima yange,” umwe womukainhu ta hokolola.
Eshi umwe womukwashiwana waAngola a kwatafana naKundana okwa ti ka ve uditile ombili kombinga yo vaAngola vakwao tave va nyeke omaliko avo.
“Paife nafye otuna oumbada yoku ka landa oinima yetu yokulandifa moAngola shaashi otwa tila okudengwa nokunyekwa omaliko etu kOvaangola vakwetu,” ta hokolola.
Omwedi wa dja ko opolifi mOhangwena ya lopota kombinga yOvaangola vati ngeenge tava lombwelwa kopolifi yaNamibia va xulife po okulandifa omahooli oo ina ma ufwa ohava kala va hala okulwifa opolifi. Onghee naashi osha eta opo Ovaangola va kale va hala okudenga ovaNamibia ovo hava ka mwefa nokulanda omahooli moAngola eshi tava nyenyeta kutya ka shili payuuki. Opolifi okwa li ya lopota kombinga yovaNamibia novanambelewa vopolifi va ninga oihakanwa yokudengwa kovakwashiwana vaAngola eshi vati hava kala tava ponokelwa ngeenge ve li moAngola.
Eetuwa mbali dovaNamibia okwa li da lopotwa dadengwa domamanya kOvaangola eshi kwa li ovaNamibia vaka mwefa omahooli moAngola.
Omupopiliko wopolifi moshitukulwa shaHangwena Sergeant Andreas Nghiyolwa okwa ti opolifi yaNamibia oya taalela eshongo linene mokukonakona ovakwashiwana vaAngola keengamba. Nghiyolwa okwa ti ovakwashiwana vaNamibia vamwe ohava i moAngola tava longifa oumbudi okuka tala oinima oyo ina i pitikilwa moNamiba. “Ovanhu ka hole okukalopota kopolifi ngeenge va nyekwa omaliko avo shaashi ohava kala navo va longifa omukalo woumbudi.
Onghee opolifi kai na kutya otai ningi po shike ngeenge omunhu a kufwa omaliko aye pefimbo kwa li ta longifa omukalo woumbudi,” Nghiyolwa ta ti.
Okwa kunghilila ovaNamibia opo va xulife po okukala tava i moAngola shi e li payuuki shaashi eshi otashi kala shi ete oshiponga ngeenge omunhu okwa ponokelwa kOvaangola noshoyo okukelela va nyekwe vali omaliko avo.