OMUPOPILIKO wopolifimoshitukulwa shaShana Inspector Thomas Aiyambo okwa ti opolifi otai ka yandja ehandukilo va fute N$1000 ile eemwedi 12 modolongo komukwashiwana keshe ta ka hangika te li kwafele keshe modoolopa.
Okwa ti opolifi oya didilika ovakwashiwana hava kala ashike tave li kwafele keshe pamwe ngeenge oushitwe tau ufana unene tuu peenhele odo hadi endwa kovanhu efimbo keshe.
Aiyambo okwa ti elalakano lokuyandja ehandukilo kovakwashiwana opo va yandje oshihopaenenwa ku vakwao opo vaha twikile nokuli kwafela keshe pamwe. “Omukwashiwana ta ka hangika te shi ningi ota ka ningi oshihopaenwa sha vakwao,” Aiyambo ta ti.
Onghee okwa ti osha fimana kodoolopa opo i kale ya putuka noshoyo okukala ina omudingonoko wa koshoka. Edi Aiymbo okwe di popya Omaandaxa eshi a ninga eenghundafana naKundana nghee a hokolola ta ti itashi ulike efano liwa ngeenge ovakwashiwana tave li kwafele ashike keshe pamwe.
“Ovakwashiwana vamwe ove hole okulikwafela poluhayela ve wetike ku keshe umwe. Onghee eshi otashi ulike kutya omunhu ine li fimaneka yemwene eshi te li kwafela komesho oyavanhu,” Aiyambo ta ti. Okwa yelifa ta ti ovanhu vamwe ove hole okulikwafela popepi neenhele ha di landifilwa oikulya eshi shi li sha nyika oshiponga shaashi otashi dulu okueta omikifi da yooloka hadi etwa kekako.
“Ovanhu vamwe ohava kala ovakulunhu ve wetike tave li kwafela komesho younona va shona,” Aiyambo ta ti. Okwa weda po ta ti opolifi oya didilika omidingonoko da kaka pena eenyata dovanhu eshi ve li kwafela po onghee naashi osha eta opo opolifi i kale ya tula po omindula wokufutifa omukwashiwana keshe ta ka hangika te shi ningi.
Okwa kunghili oshiwana opo shi kale tashi longifa ouundjuwo oove ve li vatulwa meenhele domangeshefelo. “Oshiwana nashi kale shi na eudeko kombinga yefimano loukoshoki opo ve li kaleke kokule noku li kwafela keshe pamwe,” Aiyambo ta ti.
Eshi a kwatafana naKundana mayola wodoolopa yaNgwediva Taarah Shalyefu okwa ti itashu ulike efano liwa ngeenge ovakwashiwana tave li kwafele keshe pamwe mokati kodoolopa. “Elelo lodoolopa okwa li ola ninga onghendabala yokutunga ouundjuwo wovakwashiwana ashike paife ova tewa po koshiwana shaashi ihava longifa nawa ouundjuwo,” Shalyefu ta ti.
Okwa weda ovakwashiwana ngeenge oushitwe tau fana nava kale tava longifa ouundjuwo ovo ve li poitaashi yomaholi noshoto tuu. Mayola wadoolopa yaNdangwa Paavo Amwele okwa ti muni waNdangwa naye ita popile ovakwashiwana tave li kwafele keshe pamwe shaashi eshi otashi eta ekako modoolopa.
Okwa ti odoolopa yaNdangwa nayo oya didilikwa ina ovakwashiwana hava kala tave li kwafele keshe pamwe komesho yovanhu. Onghee okwa ti eshi oshi li eshongo linene la taalelwa modoolopa yavo kombinga yovanhu tave li kwafele keshe pamwe. “Otuna oundjuuwo wovakwashiwana modoolopa yetu ashike ovakwashiwana ka ve hole okulongifa ouundjuwo ovo eshi hava kale ashike tave li kwafele pondje konima youundjuwo,” Amwele ta ti.
Amwele kunghilila oshiwana opo shi kale shi fimaneka oukoshoki momidingonoko davo.
fhamalwa@nepc.com.na