Omukulupe weedula 65 okwa kwatwa po eshi vati a dipaa ondenge yaye nondjebo konima eshi kwa li tava tanguna.
Oshiningwanima eshi osha ningwa efimbo lokonguloshi momukunda Okatope moshitukulwa shaHangwena.
Nakufya okwa tongolwa oye Johannes Hanghome weedula 51 omukalimo womomukunda Okatope.
Omukonakoni woimbuluma wopolifi moshitukulwa shaHangwena omupedu Commissioner Zacharia Amakali okwa hokolola ta ti eenhangu oda tukuka pokati komukulu nondenge pefimbo Hanghome a ya keumbo lamumwaina. Eenhangu edi oda eta opo va tamake olwoodi.
Opolifi oya hokolola tai ti omufekelwa vati okwa kufa ondjebo ndele ta yashe ondenge monhulo nokomaulu. Nakuyashwa opo a xulifila opo.
Vati okudja opo ovaneumbo ova shivifila opolifi kombinga yoshiningwanima eshi nokonima omufekelwa okwa kwatwa po.
Omufekelwa ota holoka momhangu nena, ta pangulilwa oshibofa shedipayo.
Omulumenhu weedula 35 naye okwa fya Olomakaya eshi vati a tuwa nombele molukanda Ombili modoolopa yaEenhana efimbo lokonguloshi.
Omanga omulumenhu weedula 39 oku li moshipangelo eshi naye a tuwa nombele efiku tuu olo.
Opolifi oya hokolola tai ti omufekelwa okwe uya mondingosho omo a hanga mo ovalumenhu vavali nokonima ova ka tameka tava tanguna naashi osha ka eta opo ovalumenhu ava va lwe.
Omufekelwa okwa kufa mo ombele yaye yokapi ndele ta tu ovalumenhu ovo vavali.
Oonakuninga oihakanwa ova twalwa koshipangelo shaEenhana opo vaka mone epango lopaunamiti.
Opolifi oya ti nakuninga oshihakanwa umwe okwa xulifila moshipangelo omanga kaume kaye oku li moshipangelo.
Omakonakono polifi otaa twikile moibofa aishe yomadipawo.
– fhmalwa@nepc.com.na