Ngoloneya woshitukulwa shaHangwena Walde Ndevashiya okwa ti oipindi younamapya oya fimana shaashi otai yambula po eliko loshilongo.
Ndevashiya okwa ti ounamapya oshikondo shimwe eshi hashi dulu okueta po eemhito doilonga.
Edi Ndevashiya okwe di popya pefimbo a shivifa pambelewa omauliko oipindi younamapya taa ka tamekwa okuningwa modoolopa yaEenhana Omaandaxa.
Neudo omaulikilo aa otaa ka kala ko muAnguste momafiku 10 fiyo 13 mEenhana. Ashike ngoloneya okwa ti omauliko aa otaa ka kala ko keshe komudo keenhele da yooloka koshitukulwa shaHangwena.
Ovakwashiwana vomOhangwena nashoyo oitukulwa dopushiinda tai ka kufa ombinga momaulikilo oo, omo tamu ka landifwa oikulya noshoyo oikunomwa ya yooloka.
Oilongo ya yooloka otai ka kala noku kufa ombinga pefimbo loipindi oyo.
Ta ti oipindi ei otai ka yandja omhito iwa kovakufimbinga mokuulika nomoku ku landifa oikunwa yavo.
“Oshitukulwa shaHangwena otashi lalakanene okulwifa ondjala noluhepo noshoyo okushakaenka epangelo ondjilakati,” ngoloneya ta ti.
Onghee ngoloneya okwa indila omahangano opaumwene, eeministeli da yooloka opo e uye a yambidide oipindi ei noshimaliwa opo idule okukala ya ende nawa.
Okwa kunghilila ovakalimo okudja keembinga da yooloka opo ve uye va kufe ombinga moipindi ei younamapya.
Otaku ka longekindwa ouvalelo wo wina tau ka kala ko momafiku 09 Juli opo ku ongelwe oshimaliwa shokuyambidida oipindi.