Victoria Kaapanda
Gumwe gwomwaamboka taya tamekelwa edhipago lyangoloneya nale Leonard Nangolo Mukwiilongo okwa kutha mo eyindilo kwa li a ningi opo andola a pewe ompito yo kwiifutila mo mondholongo.
Willem Nakale gwomimvo 46, okwa li a kalelwa po kuhahende gwe Maria Amupolo, ngoka a li a popi kutya eyindilo lyokumona ompito yo kwi ifutila mo oye li kutha mo.
Amupolo kwa li a gandja etompelo lya yela kutya omolwashike eyindilo lya kuthwa mo, nonando a popi kutya otashi ya shi kundathanwe esiku lyoku pangulwa ndoka ta li ka kala ko momasiku 12 gaApilili nuumvo.
Shoka okwa li eshi popi mo mpangulilo onene yaShakati Etitatu.
Esiku ndyoka aakwanezimo ya nakusa Mukwiilongo okwa li ya ningi omunyanyo gopambili, ye li ompinge kutya kape na nando omutamanekwa gumwe ta vulu okumona eyifutulemo sha landula shoka ya ningile omukulupe.
Omunyanyo okwa li gwaningwa kaakwanezimo nokokuume mOshakati okuza po polisi sigo opo mpangulilo onene yaShakati.
Mukwiilongo okwa li a dhengwa kaalumentu yahamano momasiku 25 gaApilili 2017 momudhingoloko gwaElim moshitopolwa shaMusati nokwa li a hulithile koshipangelo konima yomahepeko ngoka momasiku 11 gaMay 2017.
Aatamanekwa moshipotha muka oyo Stefanus Namapula(38), Tomas Amwele(39), Abraham Shipena(30), Hafeni Jerome(35) Evalistus Shilongo(32) and Nakale (46). Oya tamanekelwa iipotha yedhipago, uufuthi oshowo noya li wo ya adhika niilwitho kayi na oompambila. Mo2019 aalumentu mboka taya tamenekelwa edhipago lyaMukwiilonga okwa li ya ndhiki oonyala mevi ayehe no kwi igamena nomatempelo ga yooloka kutya hayo ya ningi oshinima shoka. Omutekulu gwe gumwe gomukiintu ngoka edhina lye lyishiwike koshifokundaneki shika okwa ti, oye li ompinge ye yeindilo lyoombologa.
“Aafuthi mboka oya dhipaga tatekulu, ota tu luluma sigo onena onga aakwanezimo. Tse yamwe okwa li hatu yambindhindhwa ku tatekulu ihe nena ke po, ota tu mono iihuna,’’ ta nyenyeta ngaaka”.
Ta ti, oya hala oshipotha shoka shi pangulwe pauyuki, naafuthi mboka naya mone egeelo lyawo lyeya opala.
Mukwiilongo okwa li omunangeshefa a simana, nomunapolitika.
– vkaapanda@nepc.com.na