Oonakulwa aakulu yoPLAN oya ti, oya pewa epitikilo okuza kepangelo okufula mo omidhimba dhaakondjeli manguluko ooyakwao, ya li ya fumbikwa osheendelela ethimbo lyiita momasiku 02 gaApilili 1989 kEenghandja moshitopolwa shaHangwena.
Omidhimba dhoka okwa li dha fulwamo kaakondjeli manguluko aakulu yoPLAN oshowo aakwashigwana mehuulilo shiwike.
Omukwiita nale gwoPLAN Banda Shilimela okwa ti, oya li ya fumbulula mo omidhimba dhaakondjeli manguluko aakwawo shili paveta, no ya pewa epitikilo okuza kepangelo, kaakwaneziimo oshowo komalelo agehe gena okugandja epitikilo.
“Shika okwa li tweshi ningi oshoka okwa li twa hala okufumbika aakwiita akwetu nawa, oshowo nelandulathano. Ethimbo lyiita ka kwa li tweya fumbike nawa, okwa li twathe ashike iilambo iishona eta tulamo omidhimba,” ta hokolola ngaaka. Ta ti, oya li ya hala okuya tula melambo limwe oshoka okwa li yafumbikwa momalambo ga yooloka ge li gane. “Omidhimba dhoka dhi li omugoyi, ngaashingeyi otwedhi fumbika melambo limwe, nemanya otwe li tulako nale mEtiyali,” ta popi ngaaka. Shilimela okwa ti, ita vulu okupititha uuyelele natango nkene yafumbike omidhimba dhoka, ngele odha tulwa miiketha sho dha fumbikwa paife.
“Mpoka twa fumbike omidhimba dhoka adhihe, opo twa pewa epitikilo tu fumbike,” ta ti ngaaka. Ta ti, oyo kwa li yafumbike omidhimba dhoka, sho osho shoka yena ohokwe nomukumo natango yoku fumbulamo omidhimba noku dhifumbika momukalo gwa opala. “Oomvula odhindji dha pita po, ihe aakondjeli manguluko mboka inaya dhidhilikwa. Ita tu kala nomitima dha yela ngele itatu yalongele uuyuki omanga tu li momwenyo,” ta nyenyeta ngaaka.
Ta ti, oombinzi dhaantu mboka odha kondjela oshilongo shika shi manguluke.
Shilimela okwa hokolola sha landula shoka kwa li sha pitithwa koNbc kutya, Kakukutu komatanga gwopolisi moshilongo Sabastian Ndeitunga ota konakona ngele omidhimba ndhoka odha fumbulwamo pamulandu.
“Oshike tashi konakonwa ngele Ndeitunga oye mwene etupa epitikilo okupitila pambapila kutya natu tsikile nendhilandhilo lyetu,” ta pula ngaaka. Ta ti, okwa li twa pula tango epitikilo kuNgoloneya gwoshitopolwa shaHangwena Walde Ndevashiya, ngoka a li a shangele Ndeitunga, ta pula epitikilo.
“Eyamukulo ndyoka natango okwa li twe li pewa pambapila okupitila natango kuNgoloneya Ndevashiya,” ta fatulula ngaaka.
Ngoloneya gwoshitopolwa shaHangwena Walde Ndevashiya okwa koleke kutya aakwiita mboka aakulu okwa li ya thiki pombelewa ye noyaningi omayindilo ngoka.
“Okwa li ndeya kumagidha nkene ye na okuninga opo ya pule epitikilo kopolisi. Oya li ya shanga ombaapila ndyoka twa li twa tumu ku Inspector General [Ndeitunga],” ta hokolola ngaaka. Ndevashiya ta ti, ombaapila sho ya galuka okuza kuNdeitunga oya shanga omilandu adhihe ye na okueenda nokudhi gwanitha po opo ya tsikile noshinima shoka.
“Okwa li nda pula Shilimela ngele ayihe oye yi gwanitha po, ihe okwa li a zimine kutya oya gwanitha po ashihe kwa li sha shangwa mombapila moka opo ya tsikile noshiningwanima shoka,” ta ti ngaaka.
vkaapanda@nepc.com.na