Elelo lopashitukulwa mOhangwena ola yandje ombili koshiwana molwa oikulya yoshikukuta oyo vati ya ningila nai mokandingosho kamwene womukunda mOkambebe.
Oukutu voufila 12 nomakende omaadi atano okweli tuwa a petelwa mondingosho ya mwene womukunda Okambebe Fillemon Nghipangwa, omo vati a kala mo okudja omudo 2020.
Eshi osha eta opo ovakalimo vomokunda Okambebe va ninge ehololo lomadilaadilo shaashi vati ova udifwa nai koshinima eshi.
Oshivike sha dja ko ovakwashiwana okwa li va ninga omunyano wopambili tava pula elelo laUkwanyama opo li taataye mwene womukunda wavo, shaashi kwa li a patela oikulya yoshikukuta modingosho yaye omo yeke li tuwa ya nyanouka.
Omupopiliko welelo lopashitukulwa mOhangwena Silas Nepembe okwa ti oshikumungu eshi shoikulya yoshikukuta ya nyanouka itashi ka ningwa vali eshi ombelewa yavo yau difwa nai kumwene womukunda ou a dopa okuyandja oikulya koshiwana.
Nepembe okwa ti oikulya okwa li ya pewa mwene womukunda opo ei topolele ovanamikunda vaye ashike mupya munene mwene womukunda pamwe nokomitiyee yokutopola oshikukuta ova dopa oku kwashipaleka kutya oikulya oya pewa oovena vayo.
Onghee okwa ti naashi osha ka heta opo va kale va dimbwa kutya mondingosho omuna oikulya fiyo tai nyanouka.
“Alushe ngeenge a tu yandje oikulya yoshikukuta ohatu lombwele oovene vomikunda oshoyo ookapatashu nghee ve na okukala va topola oikulya moshiwana,” Nepembe ta ti.
Okwa ti opena omilandu da tulwa kutya kapena oikulya yoshikukuta inai pitikwa okukala ya patelwa monhele yomunhu yopaumwene.
Okwa kunghilila ookansela opo va kwashipaleke kutya oikulya yoshikukuta oya pewa oshiwana va nuninwa oikulya oo opo kukelelwe oikulya iha ya nyanouke.