Aakalimo yomomalukanda mOshakati oya penduka kohi yomeya konima shiyenga ega dhenge pevi, mehuulilo shiwike.
Maria Nangolo gwomolukanda Oshikango mOshakati okwa ti, okwa li a haluka sho a oompadhe dhe dha ningine kohi yomeya sho azi kombete. Ta ti shoka kakwali e shi tsa nondjodhi.
“Sho nda thikama onda mono iikutu yandje yi li kohi yomeya, sho nda zimo mondunda, egumbo alihe lyaayetu olyi li kohi yomeya,” ta hokolola ngaaka.
Ta ti, omagumbo ga pita 10 gomepandaanda lyawo, oga li kohi yomeya okupendukila Olyomakaya.
“Nondo ongaaka otatu pandula sho twa yambindhindhwa kelelo lyondoolopa yaShakati meendelelo, sho tweya lopotele oshiningwanima shoka,” ta pandula ngaaka.
Ta ti, aanilonga yelelo lyondoolopa okwa li ya pombo omeya, e taya ningi ondjila mpoka gena okuenda opo kaaga mbombolokele we momagumbo gaantu.
“Ota tu pandula oshoka kape na ngoka a kanithile mo sha she shongushu, ka kele kiikutu mbyoka ya li ya tutu komeya,” ta ti ngaaka.
Nonando ongaaka, aakalimo yamwe yomomalukanda okwa li ya nyenyeta kutya, elelo lyondoolopa itali ya ningile uwanawa unene ngele tashiya koondjila dho kuenda omeya, uuna omvula ya loko unene.
“Olukanda lwetu olwa tyapitila ashike omeya, ihe kushi naampoka to vulu okuenda. Oshike elelo lyondoolopa itaali tutile omavi pomahala mpoka hapu kala omeya ogendji oshowo okuhupa oondjila dhomeya opo kaaga talame momagumbo getu,” omukalimo gumwe ta nyenyeta ngaaka.
Ta ti, ngele ehala olyi li kohi yelelo lyondoolopa nali pewe ashike omayakulo gafaathana ngaashi gomomahala gomoondolopa, oshoka ayehe ohaya futu iifuta yokomwedhi nonando oshimaliwa kashi thike pamwe.
Sonia Peter gwomolukanda Oneshila okwa ti, uupyakadhi mboka kaushi uupe, ohau holoka kehe omumvo pethimbo ndika lyomvula, ihe kapena shoka hashi ningwapo.
“Kehe omvula omalukanda ogo ashike gena aantu taya yelulwa molwa omeya, omolwa ashike? Oshike omalukanda itaaga longwa ngaashi ngoka ihaaga yi kohi yomeya,”ta pula.
– vkaapanda@nepc.com.na