Omupopiliko nomugandji gomauyelele melelo lyondoolopa lyaShakati Katarina Kamari okwa ti, omatala omape oga gandja ompito kaalandithi oyendji yomomapandaanda.
Omatala omape natango oga gandja ethano lyondoolopa yaShakati tali hokitha.
“Otwa kala twa taalela uupyakadhi waalandithi yomomapandaanda, nonando yamwe ya kala nomatompelo kutya omatala omakulu oge na aantu oyendji, nookasitoma otadhi nyangwaanyangwa,” ta ti ngaaka.
Omatala ngoka omape oge li mOshakati shokuuninginino, mpoka pwa kala nale uutala, konima yo Tafel House.
“Omatala ngoka oga li ga patululwa pambelewa omumvo gwa yi muDesemba, noge na uutala u li 28, womangeshefelo giikulya oshowo iikunwa yoludhi kehe,” ta fatulula ngaaka.
Kamari okwa fatulula kutya omatala ngoka okwa li ga tungwa po nomayambidhidho goshimaliwa okuza kehangano lyo-GIZ, elelo lyondoolopa lyaShakati oshowo uuministeli weyambulepo lyoondoolopa nuushayi.
“Omatala ngoka okwa li ga tungwa po okuyambidhidha aalandithi yomomapandaanda, ya kale pehala lya yela oshowo tali hokitha,”ta ti ngaaka.
Ta ti, elelo lyondoolopa natango olyi na edhiladhilothaneko lyokugwedhela omatala ngoka opo ga vule okugandja ompito kaalandithi oyendji mOshakati.
“Otwa hala okugwedhela ko omahala ngaashi gokulandithila iikutu, iikwamboga nosho tuu, opo ga kale ge li ponkatu yomatala omakwawo,” ta popi ngaaka.
Ta kumagidha aalandithi mboka ya ningi aanelago ya mona oompito dhomahala momatala omape kutya, naya kaleke po uuyogoki.
“Ookasitoma paife otadhi tondoka oshoka ehala otali hokitha, lyo olya yela. Onkene ngele otali kala lya yela sigo aluhe, nookasitoma otadhi kala hadhi ya sigo aluhe,” ta popi ngaaka.
Omulandithi gumwe momatala moka okwa ti, oyu uvite nawa sho ya mona omatala omape, oshoka oya ningi ethimbo taya mono iihuna.
“Otwa li tatu si omutenya mpoka twa li tango, paife otu li muutala wa siikila nawa, nookasitoma otadhi ende nawa,” ta pandula ngaaka.
Ta ti, otatu pandula oshoka otu li ashike pehala mpoka twa kala, nookasitoma dhetu oonkulu opo dhi li.