Eshi kwa didilikwa onghalo yomangeshefelo ya shuna pedu paife, ovalandifi momatala otava nyenyeta tava ti kutya ova hala ondado yoifendela yomatala i shune pedu shaashi paife iha va mono vali ovalandi vahapu.
Pefimbo Kundana a talela po omatala ovalandifi ova popya tava ti ova lulilwa eshi hava futu oshimaliwa keshe komwedi ashike ihava mono vali oshimaliwa shihapu eshi pehe na vali ovalandi.
Ova hokolola tava ti momapandaanda aaNdangwa omuhadi unene ovakwashiwana vaAngola tava landifa oinima ya fa ei hava landifa kovanhu momatala.
Onghee eshi osha eta opo omatala aNdangwa a kale ihaa mono vali ovalandi ve li momwaalu muhapu shaashi paife oinima ei hava landifa komatala oi li tai landifwa kovanhu momapandaanda.
Umwe womovalandifi ina hala edina laye la tumbulalwa okwa lombwela Kundana ta ti okutameka omudo 2020 eshi ombuto yoCovid-19 ya tukuka moNamibia eengeshefa davo oda hovela okushongola eshi hava kala ashike tava landifa nande eeN$10 mefiku omanga omafiku nande atatu ohaa dulu okupita po inava landifa sha.
Okwa weda po ta ti ke uditile ombili eshi omatala aNdangwa a tulwa kokule nodoolopa shaashi kae li poluyaela opo taa dulu okumonika kovanhu diva.
“Ngeeno muni okwa tungile omatala popepi nopate opo ngeenge ovanhu tava ende mOndangwa va mone omatala etu diva unene tuu ovapashiyoni,” ta ti.
Omulukupe weedula 70 oku li ha landifa momatala aNdangwa oule weedula 15 okwa hokololela Kundana ta ti ihava mono vali ovalandi vomatiti konima eshi kwa li kwa holoka onghundana kombinga yetiti kutya ohali longifwa oinima ya nyika oulodi.
“Omatiti etu ihaa landwa vali shaashi ovanhu ova tila kutya pamwe otwa shanga mo omadina ovanhu momatiti ngaashi naanaa kwa li sha ningwa moshikumungu eshi kwa li sha li tashi dana onghandala moshiwana,” ta hokolola.
Okwa weda po ta ti kashi li payuuki eshi hava futu oifendele yomatala omanga ovanhu hava landifile momapandaanda ihava futu sha.
Mayola wodoolopa yaNdangwa Paavo Amwele okwa ti elelo lodoolopa yaNdangwa ola didilikwa onghalo yovalandifi vomomatala eshi ihava mono vali ovalandi va wana eshi eliko loshilongo la shuna pedu.
Okwa ti ombelewa yavo oya kala nokumona omanyenyeto okudidilila moshiwana kombinga yonghalo yomatala aNdangwa.
“Otwa ninga nale omutumba pamwe nelelo lodoolopa yaNdangwa kombinga yoshikumungu eshi shovalandifi tava nyenyete kombinga yoyuuyemo ya shuna pedu,” Amweelo ta ti.
Onghee okwa ti ova kundafana opo ondado yoifendela yomatala i kale ya shuna pedu shaashi elelo lodoolopa nalo ola didilika kombinga yeshongo eli la taalelwa koshiwana.
“Otwa faneka yoo vali opo tu kale twa ningila ovakwashiwana vaAngola onhele apa tava kala tava landifile shaashi oshiwana otashi nyenyeta unene konghalo yovaAngola ve li hanena modoolopa yetu eshi tava landifa oinima yavo,” Amweelo ta ti.
Okwa kunghulila oshiwana opo shi kale sha ngungumana manga muni ta kandula po omukundu ou.