Ovanhu ve na oulema woshipa ove li moumbada konima eshi kwa lopotwa kutya moshilongo omu na ovanhu tava kutwa opo va kale tava landifa oipanyala neexwiki dovanhu ve na oshipa shitoka.
Ova ti kutya inava manguluka vali okuya mokati kovanhu eshi va tila okulongelwa oilonga yominyonena yo kudipawa ndele tava tetwa oitopolwa yomalutu avo.
Etitano la dja ko ovalumenhu vavali ova kwatwa po eshi kwa li tava kendambala okufuta omulumenhu e na oulema woshipa opo a kale ta dipaa ovanhu ve na oulema woshipa, yee eva kufe oipanyala neexwiki.
Ovafekelwa va dile koshitukulwa shaZambezi ova nyenwa obolooha yokulifutila mo modolongo Etivali momhangu yaKatutura moWindhoek konima eshi va holoka momhangu loshikando shotete.
Ovafekelwa ovo Fred Simasiku weedula 50 naObrine Liwelu weedula 45, noshimbofa shavo osha undulilwa komafiku 29 June 2022.
Pefimbo a ninga eenghundafana naKundana Etitatu omupresidende wehangano lovanhu ve na oulema woshipa Joseph Ndinomupya okwa ti okwa uda nai eshi ovanhu ve na oulema woshipa tava ningilwa oushada wokutetwa oitopolwa yomalutu avo.
Okwa hokolola ta ti eshi otashi eta ovanhu ve na oulema woshipa va kale inava manguluka vali shaashi paife ova tila eshi va uda onghundana ei.
“Ounona ve na oulema woshipa navo ova tila paife ngeenge tava i keefikola shaashi ova kwatwa koumbada eshi va uda kutya ope na ovanhu tava kutwa okukala tava tete ovanhu ve na oulema woshipa oipanyala neexwiki davo,” Ndinomupya ta ti.
Okwa kunghulila ovadali vounona ve na oulema opo va kale tava tonatele ounona vavo shaashi paife kaku shivike kutya ovanhu vangapi inava kwatwa po navo ve na ediladilo loku va teta oitopolwa yolutu.
“Ovadali natu findikileni ounona vetu ngeenge tava i ile tava di keefikola, ovakainhu novalumenhu ve na oulema woshipa natu kaleni tu li oupafi efimbo keshe shaashi paife katu li vali meameno,” Ndinomupya ta ti.
Sovita Josua oku na oulema woshipa nokwa hokolela Kundana ta ti okwa kwatwa koumbada wokulonda meelefa ile okukala ta ende oufiku shaashi ovanhu ve na oulema navo ova ninga oihakanwa yokulongelwa oushauda.
“Ovafekelwa nave tu lombwele kutya ovanhu vangapi ve li mokati ketu ve lihunganeka okututeta oitopolwa yomalutu etu shaashi paife otwa limbililwa,” Josua ta ti.
Okwa weda po ta ti koilongo imwe yomuAfrica oku na ovanhu ve na oulema woshipa tava li tava pi eshi hava ningilwa ominyonena kovanhu voshipa shilaula eshi hava kala tava tetwa oitopolwa yomalutu avo.
Onghee paife naye ote lipula ngeenge Ovanamibia navo mboli ova kwatwa komhepo yoku va ningila ominyonena ngaashi shi li koilongo ikwao.
Elizabeth Namwandi naye oku na oulema woshipa nokwa ti Namibia opo ashike a dana efiku lekondjelomanguluko Omaandaxa ashike paife ove udite kutya inava manguluka vali moshilongo shavo eshi paife tava ningilwa ominyonena.
“Katu shi kutya ovanhu vangapi ve na oulema woshipa va ningilwa ominyonena dokutetwa oitopolwa yomalutu avo nale,” Namwandi ta ti.
Okwa weda po ta ti momafiku 29 eshi ovafekelwa tava ka holoka momhangu loshikando oshitivali otava ka ninga omunyanyo wopambili komesho yomhangu.
Joseph Ndinomupya Omupresidende wehangano lovanhu ve na oulema woshipa.
Efano: Otwe li pewa