“Ngeno okwa li ovanailonga vouhaku va kwafela omukulakadi wange ngeno okaana ketu oka xupa. Ndokotola okwa nyamukula nge nai kutya ita dulu okuyambidida omukalukadi wange. Onda uda nai neenghono eshi okaana ketu ka fya.”
Edi oda popiwa kuRodney Pollmann ta hokolola nenyeme nghee okaana kavo ka fila medimo, shaashi vati ovanailonga vouhaku koshipangelo kOtjiwarongo va anya okuyandja ekwafo komukulukadi waye.
Pollmann oo e li omunambelewa moshipangelo omo tuu omo okwa hokolola ta ti omukulukadi waye okwa ile koshipangelo konguloshi yomafiku 06 aMaalitsa ta fetwa, ashike okwa li a lombwelwa kutya na shune keumbo shaashi vati ina pumbwa okukwatelwa meembete efiku olo.
“Eshi omukulukadi wange a shuna keumbo opa pita ashike okafimbo kanini yee okwa tameka ta ti ota vele medimo. Onda shinga pamwe tu shune ko omukulukadi wange koshipangelo fye nameemweno, shaashi oshifeta osha li tashi endelele,” Pollmann ta hokolola.
Ta ti ndokotola ou va hanga ta longo efiku olo okwe va lombwela kutya omukulukadi waye ota kwafelwa ashike mefiku la landula ko lOmaandaxa.
“Omukulukadi wange oku na 38, sho eshi oshikando shotete ta mono okaana onghee otwa kendabala opo tu hokololele ndokotola lwoikando 16 opo a ninge onghendabala yokutanda omukulukadi shaashi okaana okwa li ka fika okudja mo medimo,” ta hokolola.
“Ndokotola ina hala okuninga eshi hatu mu lombwele onghee okwa kala ashike a mwena omanga omukulukadi wange ta kuu eshi ta fetwa.””
Okwa ti efiku olo okwa lombwela ndokotola kutya ngeenge opa holoka oshiima shii ota futifa ndokotola oo, ashike ndokotola okwa kala a mwena.
Pollman okwa ti okwa kala yoo vali nokulombwela ovapangi kombinga yonghalo yomukulukadi waye ashike kape na eshi a ningwa po.
“Otwa teelela ashike fiyo Omaandaxa oo twa lombwela kundokotola opo tu dule oku kwafelwa. Eshi Omaandaxa a fika omukulukadi wange okwa pewa ashike eepela ndele ta shuna keumbo,” Pollmann ta hokolola.
Okwa ti eshi va shuna koshipangelo Etivali lomafiku 08 Maalitsa, omukulukadi waye opo a ka mona ekwafo letando ashike mupya munene okaana oka hangika nale ka fila medimo.
“Ohandi indile ounimisteli wouhaku opo u kale wa ninga omakonakono kombinga yoshikumungu eshi shaashi otwa uda nai neenghono,” Pollman ta ti.
Okwa weda po ta ti omudo wa dja ko oshiningwanima eshi okwa li sha ningilwa mumwainakadona eshi naye kwa li e uya moshipangelo ta fetwa ndele ta file okaana medimo.
Omukulunhuwiliki wouhaku moshitukulwa shaTjozondjupa Gerbardo Timotheus okwa ti naye okwa udifwa nai koshiningwanima eshi shokaana ka fila medimo shaashi ovanailonga wouhaku va anya okuyambidida omukainhu oo pefimbo.
“Kashi li mondjila, otashi yandje efano lii kovanailonga vouhaku onghee ndokotola novapangi ava va li tava longo efiku olo okwa li ashike va pumbwa okuyandja eyakulo komukainhu shaashi vati okwa li ta fetwa neenghono,” Timotheus ta ti.
Okwa weda po ta ti ndokotola okwa li e na okukala a uda kwaashi ta lombwelwa komushamane womukainhu ndele tava yambidida omukainhu pefimbo opo okaana ka xupifwe.”
“Ohandi ka ifana ovanailonga vouhauku aveshe kwa li tava longo efiku olo opo va hokolele kutya omolwashike va dopa okuyambidida omukainhu ou,” Timotheus ta ti.
Ta ti omakonakono otaa twikile.
– fhamalwa@nepc.com.na