SWAKOPMUND – Hamutjanga ntoni gombunga politika zaSWAPO, Sophia Shaningwa kahundilire nompitisili donompe dombunga politika zaSWAPO zovagolikadi asi vahareta vakadi velike mombunga ezi nye vahepa kutjangesa vagara vawo ntani vana vawo.
Shaningwa kahundilire nokutumbura nonkango dangesi pezegururo lyosigongi sovakadi mepongo lyawo lyokuhova kalikereko momapeu moSwakopmund. Vahemenimo navenye monomukunda horowero nadinye kava kakerepo posigongi sangoso.
Hamutjangantoni kagevemo yimwe eyi ana kumona asi mulyo unene, sosinene kutura vantu vawizemo vakare vahameni mombunga zetu, makura vahameni ava kuna kara wovape makura vahepa kuhanesa yirugana yombunga zawo. Ezi mbunga zahepa kukara nononkondo.
Mbunga ezi zahepa kukara mosirugana makura mwahepa kuretamo vakadi wovanzi. Nye mwahepa kuturamo nawo vakadi, novagara, novena veni ntani vadinkantu.
Nkenye gumwe gahepa kukara muhameni gombunga ezi zaSWAPO.
Tuna pumbwa yininke yangesi, yimo ana kutanta Shaningwa.
Nokugwedako asi vagara nawo vahepa kurugana unene, omu navatura varugani wovanzi unene.
Shaningwa simpe kahundilire komitiye zontjima ntjima mokukwama edi veta lyombunga politika yipo asi vahamesere mo ediveta lyombunga zovagolikadi zilize nomagano gombunga politika nasinye.
‘’Twahepa kupapara omu natuzuvhako egano lyombunga zetu, noveta ntani malikwamo gopambunga politika makura twahepa nye kusikamenapo mbunga zetu momalikwamo nagenye.
‘’ Ose twahepa kugava nombunga donongwa kovadinkantu morwa yiwo ngavatwara mbunga zetu ezi komeho moumpitisili ntani kupangera sirongo esi. Ose twahepa kudimburura nokutara asi ngapi omu natuwapukurura vadinkantu vetu yipo vatware mbunga ezi komeho. Mbunga zetu zaSWAPO zahepa kukara tazipangere momalikwamo gangesi.
‘’ yimo ana kuhundira ngoso Shaningwa. Mbunga politika simpe kaziruganesere siruwo esi nokuganesa nompitisili donompe mosirugana esi kavavahorowere sinkwa ntani, morwa eganeso kapi lyakereko morwa mukisi nye ogu goCovid-19.