Ovalumenhu vatano nomukainhu umwe ova xulifa moiponga yeetuwa itatu oyo ya ningwa mexuliloshivike.
Otaku hokololwa oshiponga osho shipe sha fila ovanhu vane, sha ningwa mOmaandaxa lwopotundi 20h00 mondjila pokati kaKaribib naUsakos.
Omupopiliko wopolifi moshitukulwa Erongo Inspector Ileni Shapumba okwa hokolola ta ti oshiponga eshi osha holoka po eshi otuwa yoPolo oyo yali tai di koWalvisbay ye lidenga mumwe nobaki yoToyota oyo ya li tai di kombinga yaKaribib. Ovanhu vatatu mwa kwatelwa omushingi ova xulifila ponhele yoshiponga, omanga umwe a ka xulifila koshipangelo.
Oonakufwa aveshe ova li motuwa yoPolo. Ava ova kwatela mo omushingi weedula 37 Kamilo Ihuhwa, Andreas Sheekuli, Chris Festus naJohanna Hamutenya. Ndangi Angula (27) okwa xulifa keengulasha dOsoondaxa eshi a nyengwa okupangela otuwa yaye fiyo tai lidenge mekuma leumbo li li popepi nopate. Oshiningwanima eshi osha ningwa po03h00 moWindhoek. Otaku hokololwa omulumenhu ou a dja po poshiponga e na omwenyo, ashike okwa ka xulifila koshipangelo shaKatutura.
Okwa hokololwa yoo Matheus Natangwe (43) a xulifila pEtunda moshitukulwa shaMusati eshi otuwa yoToyota omo a li onga omutwaalelwa ya wa ko kopate komamanya noku alangata.
Opolifi oya ti omushingi wotuwa okwa twalwa koshipangelo nonghalo yaye okwa hokololwa i li xwe po.
Ovakwapata voonakufya aveshe ova shivifilwa nale.