Oitukulwa yokonooli oi li monghuwo i na onghambe ngeenge tashi ya kominyonena omaludi nomaludi. Omupopiliko wopolifi moshitukulwa shaShikoto Inspector Ellen Nehale okwa ti ounona vashona ova ninga oihakanwa yokulongelwa oilonga youshada yopaixulo, edi okwe di popya konima eshi okaana keedula heyali ka kwatwa onghonga Omaandaxa momukunda Okaluwa .
Nehale okwa ti okwa hokolola ta ti okaana okwa li ke li mondjila yokudja kofikola ke li oko akeke eshi ka shakena nomufekelwa ndele ta dula okaana oikutu fiyo ta i nako moixulo moixwa.
Omufekelwa okaana kokamati keedula 16 noka kwatwa po Etivali meumbo lavo momukunda Okaluwa.
Nehale okwa hokolola ta ti ombelewa yaye oya didilika oshiwana shi hole okulopotela opolifi kwa laata oibofa yomakwatonghonga.
Naashi ohashi longifa opolifi noudjuu opo i dule okukala ya ninga omakonaakono diva.
Okwa kunghulila ovadali opo va kale va kotokela ounona vavo ngeenge tava di mo meumbo shaashi ounona, ovakulupe novanhu ve na oulema ova ninga oihakanwa yokukwatwa onghonga.
Momwedi Januali, mOshikoto komukunda Okamwandi okwa li mwa lopotwa oshiningwanima shokaana keedula 17 ka kwatwa onghonga kovalumenhu vatatu.
Ovakulupe vavali navo ova lopotwa neudo va kwatwa onghonga moshitukulwa shaShikoto, omanga oshivike sha dja ko omwa lopotwa ovakainhu vavali va longelwa oilonga youshada eshi navo va kwatwa onghonga.
fhamalwa@nepc.com.na