Ovakalimo ova shaala pomutenya eshi eebashu davo 23 da yaka omundilo Etitano efimbo lokomatango lopotundi 17h00 kolukanda Tutaleni modoolopa yaWalvis Bay.
Okwa kolekwa kutya moshiponga shomundilo omwa fila okaana kokamati keedula nhatu Immanuel Iyaalo Abisalom ka fya eshi ka pyapo filufilu.
Opolifi oya ti omundilo owa e twa kokaana eshi ka fiya ombiya ili kefiya latema ndele ta kapate po pobashu, nokonima yefimbo omundilo owa haka mobashu yavo fiyo tau tandavele keebashu adishe.
Omupopiliko wopolifi moshitukulwa Erongo Inspector lleni Shapumba okwa hokolola ta ti ovanhu ova kanifa omaliko ayeshe avo eshi a pila meebushu omo.
Okwa ti omakonakono opolifi otaa twikile.
Okwa didilikwa odoolopa yaWalvis Bay noSwakopmund odo unene da ninga oihakanwa yokupya eebashu eshi omudo wa djako eebashu 16 da yaka omundilo kolukanda DRC modoolopa yaSwakopmund, omo kwa li mwa monena oshiponga okaana keedula mbali.
Omudo 2020 nayo owa lopotwa mwa pya eebashu 153 kolukanda Twaloloka, omo mwa fila okaana kokamati eshi ka pyapo filufilu.
Opolifi oya kunghulila oshiwana opo shi kale sha kotokela omindilo ngeenge tashi teleke oshoyo okupopya nounona momaumbo opo va ha dananene omundilo.