Omupresidende mukulu waNamibia Dr Hifikepunye Pohamba okwa ti okwa indila oshiwana opo shi twikile nokuyambidida oshipupudilo shoNust shaashi natango oshipupudilo osha pumbwa omakwafo a yooloka.
Pohamba okwa ti okwa pandula Ovanamibia eshi va fimaneka ehongo eshi va yambidida Eenhana Nust omudo wa dja ko noshimaliwa shomilliona imwe.
Edi Pohamba okwe di popya pefimbo lepatululo loshitayi shoshipupudilo shaNust Etine kendiki laBilly William Mwaningange loRural Development Centre kEembaxu eshi a ti oshipupudilo osha pumbiwa moshilongo opo ovanafikola va mone omhito yokulihongela omaifano a yooloka.
“Onda pandula unene eshi mOhangwena mwa totwa oshipupudilo shaNust shaashi paife ounona vahapu va dja koitukulwa ya yooloka otava kala tave li hongo noupu,” Pohamba ta ti.
Okwa ti ngeenge oshilongo oshi na ovanhu va longwa eshi otashi hambula po oshilongo shi kale shina etuko, nomayakulo a yooloka ngaashi oipangelo nosho tuu.
Efiku tuu olo Pohamba okwa tambula ko oshimaliwa N$500 000 sha yandjwa kehangano loFirst Rand Namibiba omanga ehangano loNAMDIA nalo ola yandja N$500 000s lo opo shi yambidide oshipupudilo shaEenhana Nust.
Moshipopiwa shaye omuprimaminista Saara Kuugongelwa Amadhila okwa pandula Nust eshi ta lalakanene okuyandja ehongo longushu kovanafikola opo va dule okukala ve na owino momaifano a yooloka
“Ounona vahapu ita ka enda vali eendjiladiledile tava i koipupudilo yokukole shaashi paife opena Eenhana Nust onghee okwa ti eshi onghundana iwa kounona nokovadali vavo okukala ve na omaludalo avo taa ka fikola popepi,” Amadhila ta ti. Okwa ti oshipupudilo shaEenhana Nust ota shi ka yandja eemhito doilonga kovalimo vahapu va dja moshitukulwa shaHangwena eshi ovanhu tava ka mona oilonga ya yooloko moshipupudilo.
Ovanafikola ve dule 200 ove li shangifa koshipupudilo shaEenhana NUST opo ve li hongele omaifano a yooloka neudo.