Omukuluntu gwopolisi moshitopolwa shaMusati Titus Shikongo okwati, aalumentu nayo otaya dhana onkandangala momadhipago goohanona oshowo metapemo lyomategelelo kaakiintu.
“Aalumentu oya pumbwa okulundulula, naya kale taya yambindhindha aakiintu yawo. Oshike yena okugandjela omategelelo ngele inaya ilongekidha,” ta pula ngaaka.
Ta ti, shoka osho shimwe adhidhilika hashi nkundipaleke omandhilandhilo gaakiintu haya longo iilonga mbyoka yi nyanyaleka. “Gamwe nonando haayehe, oha kwatwa komandhilandhilo kutya otaya ka tekula ngiini okanona hoka, ngele kena iiyemo yasha,” ta popi ngaaka.
“Shikongo okwa kumagidha oshigwana shi kale aluhe tashi kongo omakwatho okuza kaahungimwenyo oshowo ku kehe ngoka ta vulu okugandja omayele omawanawa. Oohanona oonzo dha Kalunga kaadhina nando ondjo; onkene shoka handhi longelwa oshapuka noonkondo,” Shikongo ta ti.
Ta ti, oshigwana nashi shiwe kutya uuna gumwe a kutha mo etegeleleo nenge a dhipaga, ondjo hayi pewa egelo.
“Ondi uvite kutya iiningwanima mbika otayi ningwa unene kaanyasha, onkene oya pumbwa okumona omalongo ga gwana okudhidhilika kutya iiningwanima yolundhi ndoka oya puka,” ta ti ngaaka. Shikongo okwali a popi ngaaka konima yomukiintu gomimvo 21, a mangwapo sho a ekelehi ohanona ye kombululu yokandjugo.
Ta ti, oshiningwanima shoka osha holoka Olyomakaya, momukunda Omunyele moshikandjohogololo shEtayi. Otaku hokololwa kutya omudhimba gwohanona okwali gwa monika ashike Etiyali. Shikongo ta ti, omukiintu ngoka okwali imonitha ohanona ye mwene, no kwali eyi tonyone mokakumbatha.
Ta hokolola kutya ohanona okwali eyi ekelehi kombululu yokandjugo hoka keli mepya lyandjawo.
Shikongo ina gandja uyelele kutya olutu lohanona ndyoka oyali ya monika ngiini no kulye.
Omakonakono gopolisi ogeli metifa.