Ovakwashiwana vahapu koitukulwa yokonooli ove na omukumo kutya neudo otava ka likola mo sha shakola momapya avo eshi tava twikile nokumona omayakulo okudilila kouministeli wounamapya, omeva nomatulilo omadu.
Mexuliloshivike minista younamapya Calle Schlettwein okwa yandja ehongo kovakalimo va dja komikunda da yooloka domoshikandjohoolo shaNgwediva nghene ve na oku longifa oilongofo yopaunamapya yoilongifo ya yooloka ngaashi okashina kokutwika oilya, okashina kokuhelela, okashina kokukuna, okashina kokutula oushosho medu oshoyo okashina kokudipaa oipuka koikunomwa.
Ehongo ola ningilwa komukunda Ohakweenyanga mOngwediva, oku kwa li kuna minista novanambelewa va dja kouministeli wounamapya oshoyo ovanafaalama. Minista okwa ti oshikondo shounamapya osho shimwe sha fimana moshilongo shaashi oshi dulu okuyambula po eliko loshilongo tashi pitile momangeshefelo. Onghee Schlettwein okwa ti epangelo otali twikile nokuyambidida ovanafaalama mounamapya unene tuu oshiwana eshi shili koitukulwa yokonooli opo shi dule okukala tashi longo noupu momapya avo.
“Ngeenge epangelo tali yambidida oshiwana eshi otashi yandje omukumo koshiwana opo shi longe nokundjungu,” minista ta ti. Minista okwa kunghulila oshiwana opo shi longife nawa oilongifo tai ka pewa ovanafaalama nokukwashipaleka kutya otai ka longifa ashike momapya.
Okwa ti oilongifo ngaashi okashina kokuyelela ota kahilwa N$20 mefiku keshe ashike eumbo keshe ola pitikwa okukala nokashina oule womafiku anhee.
“Oilongifo oili keembelewa dounamapya koitukulwa aishe yokonooli onghee ku keshe ou e na ehalo okwa manguluka opo a ka ninge omaindilo oilongifo keembelewa,” Schlettwein ta ti.
Moshipopiwa shaye mwene womukunda Ohakweenyanga Daniel Kaili okwa ti okwa pandula unene ouministeli wounamapya eshi tau twikile nokuyambidida ovanafaalama vokonooli. Kaili okwa ti eshi osho omukalo muwa wokukondjifa ondjala noluhepo moshiwana shaashi paife ovakwashiwana tava ka dula okumana ko omapya avo eshi tava ka kala tava longifa okashina kokuyelele. Kaili okwa kunghulila oshiwana opo shi longe noudinini momapya avo nokukala yoo vali shaxulifa po onghalo yokuya keendingosho eevili doilonga shaashi neudo okuna omuloka muhapu.
“Otwa pandula epangelo letu eshi tali longele ovanafaalama va shona omauwa, paife ohandi dulu okumana ko epya lange shaashi otwa yambididwa noushina vokuyelela noilya yetu otai ka kula nawa shaashi epangelo ole tupa oimiti nokushashamina koikunomwa yetu opo tu kelele oipuka.”
Aa omatumbulo aLetisia Kashinduka omukalimo womomunda Elombo ta hokolola nghee eudite ehafo paife eshi va longelwa oilonga iwa kouministeli wounamapya.
Okwa ti oilongifo ya yandjwa oipu kulongifa, yoo iha i pula omunhu a longwa, yoo ohai endelele okulonga onghee neudo okuna omukumo kutya ote ke likolamosha shihapu mepya laye.
“Oilongifo otai ka hilwa kondado ili pedu unene onghee ovanhu ve na oyuuyemo ili pedu navo otava dulu okukala va mona omhito yokukaninga omaindilo oilongifo,” Kashinduka ta ti.