Eshi opolifi fiyo opapa inai mona ouyelele kombinga yovakwapata vomukainhu oo olutu laye la hangika moixwa, komufala wopolifi moshitukulwa shaMusati Titus Shikongo okwa ti omafano oidjalomwa yanakufya otaa ka tulwa komalungula nosho yo moikundaneki.
Shikongo okwa ti elalakano opo oshiwana shi kale sha kongifa ko opolifi mokuyandja ouyelele kombinga yovakwapata vomukainhu shaashi ouyelele ou owa pumbiwa diva kopolifi.
Edi Shikongo okwe di popya Etine eshi a ninga eenghundafana naKundana. Shikongo okwa indila moshiwana kwaau a kanifa omupambele waye opo oshiwana shi kale sha talela po okila yopolifi pOkahao sho shi kale sha ka tala ngeenge olutu li li kokila olomupambele wa vo.
“Opolifi otai lipula kutya pamwe omukainhu ou okwa dja nande okoitukulwa yokokule yomoshilongo ndele te uya okulongelwa oilonga youshada mOmusati,” Shikongo ta ti.
Olutu lomukainhu ina shivika okwa li le lituwa moixwa la ninga nai oshivike sha dja momukunda Omushii moshitukulwa shaMusati inali djala sha komulumenhu ou kwa li ta lifa eendoongi daye moixwa. Opolifi oya ti omukainhu ota fekelwa e li peedula 20 ile 30, oikutu ya hangika ponhele opo ombelukweva ilaula, eenghaku dilaula donomola onhi-nhano, yee vati oku na ofika yopokati.
Opolifi oya hokolola tai ti omukainhu kaimba oku na okukala a longelwa oilonga youshada yokukwatwa onghonga ndele ta dipawa konima eshi omufekelwa a ya naye moixulo.
Opolifi otai indile moshiwana kwaau e shi ovakwapata ile ookahewa vomukainhu ou opo va kwatafane nopolifi diva keenomola 0814554445, tava pula Chief Inpector Mwanyangapo ile 0812453825 ,tava pula Sergeant Kashinyenga ile oshiwana shi lopotele keshe opolifi i li popepi.
fhamalwa@nepc.com.na