Opolisi moshitopolwa shaShana oyi li molukongo lwomulumentu gwomimvo 31, Thomas Mathew ngoka anuwa i iyaka mondholongo oshikando oshitiyali.
Otaku hokololwa kutya Mathew okwi iyaka pethimbo a li a falwa kompangulilo yaShakati, shika oshikando oshitiyali ta longo oshilonga sha faathana, konima yoomwedhi ne sho a li natango i iyaka mondholongo.
Sha ikolelela kuuyelele wa gandja komupopiliko nomugandji gwomauyelele gwopolisi moshitopolwa shaShana Thomas Aiyambo, oshiningwanima shoka osha holoka Etitano lya zi ko. Ta ti, omulumentu ngoka anuwa okwa li a yi ontuku pethimbo a li a falwa kompangu, sho kwa li a iyaka natango mondholongo omumvo gwa yi.
“Omulumentu ngoka okwa li a mangwa tango sho a li a yaka ookompiuta dhopeke mehangano tali ithanwa Hi-Fi corporation,” ta hokolola ngaaka. Ta ti, okwa li i iyaka mopolisi yaNgwediva muKotomba gomumvo gwa yi, omanga kwa li a tegelelwa okukuthwa uukwatya we.
“Omulumentu ngoka okwa li a ka mangwa konima yomasiku 15 gaKotomba omumvo gwa yi,” Aiyambo ta ti ngaaka.
Ta gwedha po ta ti, pethimbo ndika opo a ye ontuku okwa li a tegelela okuya mompangulilo yopevi yaShakati.
Sha ikolelela kuuyelele wa gandjwa kwaamboka ya li pompangulilo yaShakati, omulumentu ngoka okwa li a yi ontuku omanga aapolisi ya li ya ipyakindhila nomunangeshefa Sindano Hango ngoka a li a tokolelwa egeelo lyomuyonena gwe Etitano ndyoka. Otaku fekelwa a pitile moombuli dhompangu, e ta kwata okatakisi nokuya.
Aiyambo sho kwa li a pulwa kutya omulumentu ngoka okwa londo ngiini omanga e li momake gopolisi, okwa ti pethimbo ndyoka kakwa li a tulwa miiketanga, onkene osha li oshipu kuye okuya ontuku.
“Uuyelele kandi wu na awuhe kutya oshike ka li a tulwa miiketanga omanga e na nale oshipotha shokwiiyaka mondholongo,” ta popi ngaaka.
Opolisi otayi indile moshigwana kehe ngoka e na uuyelele mpoka pe na omulumentu ngoka a lopotele opolisi yi li popepi naye.
Otaku hokololwa kutya omulumentu ngoka ogwolutu lu li pokati oshowo ke shi omuyelele ye ke shi omuluudhe.
Aiyambo okwa gwedha po kutya okwa konakonwa kutya omulumentu ngoka oha shingile unene molukanda Okangwena mOndangwa, mOkandjengendi oshowo omalukanda gamwe mOshakati. – vkaapanda@nepc.com.na