Festus Hamalwa
Oikandjohoololo yokonooli otai dengwa kenota eshi opaipi yomeva yaNamwater tai ende kashona okutwalwa omeva koshiwana omanga eepomba dimwe iha di longo vali.
Omikunda da yooloka komoitukulwa ngaashi Omusati, Ohangwena nOshikoto odo dimwe dadilikwa dina ovakalimo va talela eshongo linene lomeva. Paife oshiwana ohashi kateka keendungu omanga vamwe ohava kateka komifima tava ende eendjiladiledile.
Ovakulupe navo ova ninga oihakanwa yokudengwa kenota shaashi vahapu iha va dulu okuya komatambi omeva.
Omunashipundi welelo lopaukansela moshitukulwa shaMusati Andreas Shintama okwa lombwela Kundana ta ti oikandjohoololo ihapu moMusati oya kumwa konghalo yopaipi yaNamwater tai ende kashona eshi oshiwana hashi kala ashike tashi kwene enota keshe efiku.
Shintama okwa ti eefikola, noupangelo navo ova kumwa konghalo yomeva shaashi paife ohava twalelwa eendoloma domeva ashike ina di wanena ovanhu aveshe shaashi ovanhu ovahapu.
Shintama ou eli yoo vali kansela woshikandjohoololo shaRuacana kwa hokolola ta ti ovanhu vamwe ohava nu meemboola dina omeva alula shaashi kapena sha omifima dokuteka.
Kansela woshikandjohoololo shaMundaungilo moshitukulwa shaHangwena Festus Ikanda naye okwa hokolola ta ti eepomba dihapu domoshikandjohoololo shaye ita di longo vali nawa eshi omeva aa kale ta ende kashona.
Okwa ti ounona va shona ova ninga oihakanwa yokukwatwa komifi da yooloka eshi hava kala tava nu omeva a dja meendungu nomomifima.
“Oshiwana ohashi kala shangudumana pombelewa yoshikandjahoololo tashi kwena enota sha hala omeva,” Ikanda ta ti.
Okwa ti oimuna nayo oya kumwa konghalo yenota unene tuu pefimbo eli loshikukuta shodula ita i yoloko vali manga.
Mayola wodoolopa yaMuthiya Johannes Ndeutepo meenghundafana va ninga nakundana okwa hokolola ta ti odoloopa yaMuthiya nayo oya talela eshongo linene lomeva aa kala ta ende kashona omanga omafimbo amwe oha kala apata.
Ndeutepo okwa ti ovakalimo vamwe ohava ningi eenghendembala dokuya keendungu opo va ka konge omeva okulongifa momaumbo.
Omupopiliko waNamwater John Shiwedha okwa ti Namwater okwa didilika onghalo yoshikumungu shomeva ta ende kashona.
Okwa ti Namwater okwe li pyakidila nokutalela po oitukulwa ya yooloka yokonooli opo a didilike oupyakadi wa telelwa koshiwana nokukala a ninga omalongekido nghee u na okukala wakandulwa po.
Shiwedha okwa ti omukulunhuwiliki oshoyo ovanambelewa vakula vaNamwater ova talela po yoo vali opaipi ei ili moAngola opo va kundafane kombinga yomukundu ou.
“Otwa shakeneka yoo vali oongoloneya, omalelo opaukansela oshoo ovakwashiwana opo tu tutopolelafane omayele kombinga yoshikumungu eshi,” Shiwedha ta ti.
Okwa ti Namwater okwa tula eepolongalama dihapu moilonga nale ngaashi okutungulula ocanala komeva, nokukala a eta po opaipi yakula okudja koshitukulwa shaShikoto fiyo koitukulwa aishe yokonooli opo oshiwana shi shi kale tashi mono omeva a wana.
Okwa weda po ta ti oshiwana nashi shangunguma nokukala she linekela Namwater fiyo ta kandula po omukundu womeva.