Festus Hamalwa
Kansela woshikandjohoololo shaKankolo Hans Nambondi okwa ti oshiwana shovayelele shili moshikandjohoololo shaye osha talela eshongo linene eshi tashi dengwa kondjala.
Okwa ti ombelewa yaye ohai kala i na oshiwana shovayelele sha ngudumana tashi kongo ekwafo loikulya kukansela ashike kape na sha oikulya.
Nambondi okwa hokolola ta ti oshikandjohoololo shaKankolo osho shimwe sha didilikwa shi na oshiwana shovayelele shihapu onghee naashi oshi li eshongo linene okuyandja oikulya koshiwana shaashi ovanhu ovahapu unene.
Okwa ti ombelewa yaye oya kala nokuninga eenghendabala dokuyambidida oshiwana noikulya ta longifa oshimaliwa okudja mondjato yaye mwene omafimbo amwepo.
Kansela okwa ti moshikandjohoololo omu na yoo vali ovanhu vamwe navo ve li momhumbwe yoikulya eshi hava kala tava dengele kombelewa tava pula oikulya omanga vamwe ohave uya nounona vavo tava kwena ondjala.
Nambondi okwa ti ovakalimo vomoshikandjohoololo shaye ihava mono oikulya yoshikukuta tai di kepangelo ngaashi kwali nale ovanhu hava pewa.
Onghee kansela okwa ti ota indile moshiwana opo shi yambidide oshiwana eshi tashi dengwa kondjala shaashi osha pumbwa oikulya.
“Kwaau e na ehalo lokuyambidida na kwatafane nombelewa yange ile a kwatafane nombelewa yangoloneya yopashitukulwa,” Nambondi ta ti.
Okwa weda po yoo vali ta ti ovanhu nava xulife po okukala tava i keendingosho pefimbo loilonga shaashi okwa didilikwa ovanhu vamwe ve hole okuya keendingosho eengula dinene.
fhamalwa@nepc.com.na