Okuna ashike omwendhi nomasiku omashona Aanamibia ya yaza kooombinga noombinga ye ye pamwe moku dhimbuukwa esiku lyomapendafule.
Nuumvo esiku ndika okwa longekidhwa opo li ka kale kondoolopa yOmuthiya moshitopolwa shaShikoto.
Uuministeli womauyelele nomakwatathano gopaungomba owa pititha omushamgwa kutya
esiku lyomapendafule, 26 yAguste nuumvo otali ndhimbulukilwa kOmuthiya pehala lyomayinyanyundho, tali ithanwa Recreational Park.
“Shika oshikando oshiti-34 esiku lyomapendafule tali ndhimbulukwa oku za nkene oshilongo sha mangulukile, no hali ndhimbukilwa miitopolwa ya yooloka omumvo kehe,” ya leshwa ngaaka.
Ngoloneya gwoshitopolwa shaShikoto Penda Ya Ndakolo okwa ti ota hiya oshigwana ashihe shaNamibia opo shi kale sha thika shi vule okundhimbulukwa esiku ndjoka lyiikalekelwa nolyasimanekwa pamwe naakalimo yomOshikoto.
“Ndika olyo esiku moka hatu ndhimbulukwa nokusimaneka omapendafule goshilongo shetu ngoka ge tu tetekela nale oshowo ngoka ge li momwenyo nogi iyambela nenge ya gandja oomwenyo dhawo omolwetu tu vule okukala mombili ngaashi tu yi na nena,” Ya Ndakolo ta fatulula ngaaka.
Okomitiye yopashitopolwa yina sha nomalongekindho anuwa oya tameka nale nomalongekidho goshituthi shika oshinene.
Ya Ndakolo okwa pandula Omupresidente gwoshilongo Nangolo Mbumba sho a hogolola oshituthi shendhimbulutho lyesiku lyomapendafule shi ningi lwe mOmuthiya.
Oshituthi shika anuwa itashi yi moshipala iitopolwa yilwe okudhimbulukwa esiku ndyoka.
Omuthiya ogwa tseyika nawa oshoka ogo omweelo gwoku ya kevi lyiimpungu nogwa simanekwa
wolwa edhiginino lyomuthigululwakalo nomolwa uushitwe wa yooloka kiitopolwa yilwe moshilongo.
Sigo ompaka ina ku tseyithwa kutya olye omupopi gwesiku,
ashike omitse dhoombelewa dhaakalelipo yiilongo yayooloka oshowo omalenga nookapatashu okuza momikunda moshitopolwa shoka otaya ka holoka.
Okutala kuuyamba gwomithigululwakalo moshitopolwa shika, iidhano yopashigwana okumwenyeka engungo lyaanashituthi otayi ka dhana onkandangala esiku ndyoka.
Okwa tseyithwa kutya oshituthidhimbuluko shonuumvo otashi ka mwenyekwa koyendji, shi vulithe omimvo dha zi ko.
– vkaapanda@nepc.com.na