Charles Ndeumane
Namibia naBotswana oya nkondopeke elongelokumwe lyawo miikondo ya yooloka pethimbo omupresidente gwaBotswana a li a talele po Namibia oshiwike sha zi ko, unene tuu mokuyambula po iiyemo nonkalo yomahupilo miilongo mbyoka iyali.
Pethimbo lyiigongi yopambelewa metalelepo lyomupresidente gwaBotswana Mokgweetsi Masisi moNamibia omupresidente gwaNamibia Nangolo Mbumba okwa dhenge omuthindo kesimano lyelongulokumwe pokati kaNamibia naBotswana ngele tashi ya kokweeta po iiyemo nokuyambula po onkalo yomahupilo.
Mbumba okwa ti epangelo lyaNamibia olya pe Botswana oshipambu shevi komatulilosikepa gaWalvis Bay opo Botswana a kwatakanithwe kefuta oshoka Botswana oshimwe shomiilongo mbyoka kaayi na efuta. “Onda tseyithilwa kutya Botswana okwa hala okwiindjipaleka iilongomwa mbyoka ha landa kiilongo iikwawo naambyoka ha landitha kiilongo iikwawo okupitila komatulilosikepa gaWalvis Bay. Shika otashi ti otu na okulongela kumwe meendelelo opo tu yambule po oondjila ndhoka dha kwatakanitha iilongo mbika iyali opo ongeshefa yi ende nawa pokati kiilongo mbika,” Mbumba a ti.
Presidente gwaBotswana Mokgweetsi Masisi okwa ti Namibia naBotswana oya pumbwa ya longele kumwe ngaashi miikondo yomatalelopo nomaendathano, uunamapya nuuniimuna, iikwankondo, oshowo elongitho lyoopate. “Nonande ekwatathano pokati kiilongo mbika iyali olyi li mawa lela, natango inatu adha lela oontengenekwathaneko dhetu kombinga yiiyemo nomahupilo,” osho Masisi a popi ngaaka pethimbo lyoshigongi shoka sha li pokati komapangelo giilongo mbika iyali.
Mbumba okwa simaneke elongelokumwe ndyoka lya kala pokati kiilongo iyali uule woomvula odhindji. “Namibia naBotswana oye na ondjokonona yelongelokumwe ya za nale ndjoka yi na omidhi dhayo mesimanekathano niilalakanenwa yomahupilo ge li hwepo oshowo ehumokomeho. Nena otwa thikama twa hangana metsokumwe lyetu opo tu nkondopeke ekwatathano lyetu ngaashi sha kala moomvula dha piti,” Mbumba ta ti.
Oshinima oshiwanawa okumona iilongo mbika tayi adha omatsokumwe taga nkondopeke omakwatathano nelongelokumwe lyawo ndyoka kwa li tali teka moomvula dha piti molwonkalo yiikolokosha ndjoka ya li komapitilo goongamba haandiya yomulonga gwaKavango.
-mrndeumaneraycharles@gmail.com