Charles Ndeumane
Aantu oyendji oya mbombolokele komalungula taya ulike uukwawo wanankali kaanegumbo ya thigwa pomutenya komulilo mOndangwa.
Egumbo lyakuku Teopolina Iyambo moka kwa li ha zi nomwanakadhona gumwe oshowo aatekulu yatatu, olya pipo thilu thilu oshiwike shika komulilo kaaye shi kutya owa etwa koshike. Otaku hokololwa omulilo gwa tameke mondunda yimwe yoku lala nogwa taandele sigo egumbo niinima ayihe ya li mo ya pipo thilu.
Oshigwana oshindji ota shi pula uuyelele kombinga yofamili ndjoka ya pilwa kegumbo lyawo lyomala ge li gane nelalakano lyoku gandja omakwatho.
Oyendji oya gandja omayele opo ofamily ndjoka yi tote po epandja lyoWhatsApp opo mboka ya hala oku gandja omakwatho ya kwatathane nayo. “Ofamili nayi tote epandja lyoWhatsApp ndele aantu ta ya umbu oshimaliwa shi kwathele moku tungulula egumbo ndyoka,” osho omulongithi gwoFacebook gumwe a shanga.
Grace Kangombe, omwanakadhona gwaIyambo okwa ti oshiningwanima shoka osha ningwa pondatu yoku pendukila Etiyali lyomasiku 25 June 2024. “Elago enene inamu ehamekelwa nande omuntu, ashike omaliko agehe oga pila mo. Pompito mpaka omakwatho goludhi kehe ota tu ga taambaka nomaaka agehe, ngaashi iikutu niimbumbatha nayo otwe yi pumbwa,” osho Kangombe a lombwele Kundana.
Aalongithi yoFacebook oyendji oya gandja uusama kukadhimamulilo ngwomondoolopa yaNdangwa molwaasho anuwa a kwata ethimbo ele unene oku thika pegumbo ndyoka sho omulilo gwa tameke.
“Epulo lyandje olyi li mpa, ondoolopa yaNdangwa oyi thike peni notashi kwata ethimbo li thike peni opo kadhimamulilo a kale a thika pegumbo mpono? Ondi wete kutya aaniilonga yoku dhima omililo iha ya kutha ko iilonga yawo neitulemo,” osho gumwe a shanga ngaaka.