OSHAKATI- Omukulunhufikola ha longelo kofikola i li moshitukulwa shaHangwena okwa anyenwa omhito yoku li futile mo modolongo shaashi vati a kwata onghonga okamonakadona keedula 15.
Omulumenhu ou weedula 44 okwa holoka oshikando shotete momhangulilo yamangestalata mOshakati Omaandaxa oshivike eshi.
Oshibofa shaye osha undulilwa komafiku 16 Januali 2025 omanga ta ku ningwa omakonakono omoule.
Omutamanekwa ou ota pangulilwa oshibofa shetwatonghonga she li kwatelela komahepeko omomaumbo.
Oshiningwanima osha ningwa pokati kaDesemba womudo 2023 noshoyo neudo muJanuali.
Otaku hokololwa kutya okaana oka kala nokukwatwa onghonga lwoikando ya yooloka.
Nakuninga oshihakanwa oha fikola pofikola opo hapa longele xe noku li mondodo onhi-9.
Omukulunhu koshikondo shokukonakona oimbuluma wopolifi moshitukulwa shaShana, omupedu Commissioner Fedrick Ndjadila okwa hokolola ta ti okaana oha kadi meumbo limwe naxe mOshakati.
Opolifi oya hokolola tai ti omahepeko oo opaixulo okwa tameka noshiningwanima omo omulumenhu ou vati a ifana omona monduda yaye yokunangala opo vati eke mu fule keemadi.
Okudja opo omukulunhufikola ou okwa lombwela okaana kutya ota ka monika nawa nokuweda po ta ti omonakadona okwa kula paife nokuya moixulo.
Opolifi oya ti omulumenhu ou okwa dima ko kolusheno ndele tai moixulo nokaana kaye ashike vati ina longifa ongumi.
Okudja opo vati okwa lombwela okaana kaye kutya ina ke shipopya komunhu shaashi ota kala aye modolongo ndele taka kala kehe na xe woku ka yambidida.
Ota ku hokololwa kutya neudo momwedi Januali omukulunhufikola ou natango okwa ya moixulo nokamona oko tuu oko lwoshikando oshitivali.
Ouyelele ou vati owe uya kombada konima eshi omulumenhu ou efiku limwe a denga omonakadona nokudja opo okaana oka popya ta kati otaka lopota xe kutya okwe ka kwata onghonga.
Omulukunhuwiliki wouministeli wehongo Sanet Steenkamp okwa koleka ta ti ombelewa yaye oya shivifilwa komukulunhuwiliki wehongo mOhangwena kombinga yomukulunhufikola a kwatwa po mekwatafano loshibofa shekwatonghonga.
“Ohatu ka landula omilandu odo da tulwa po kokatendo kovanailonga vepangelo,” Steenkamp ta ti.
Okwa weda po ta ti omakonakono omoule otaa twikile kombinga yoshikumungu eshi.
Steenkamp okwa ti eshi ofikola otai ka tameka ombelewa yaye otai ka ninga omalongikido okukwafele omunafikola ou a ninga oshihakanwa shekwatonghonga.
“Omunafikola otaka pewa omayakulo exungomwenyo noshoyo ohatu ka kwashipaleka kutya okaana itaka shindwa kovanafikola vakwao,” ta ti.
Ovahongifikola tava longele pofikola opo ha pa longele omulumenhu ova popya tava ti ove na oumbada kombinga omolwa onghalonawa yokaana oko shaashi otaka ka kala taka shindwa kounona vakwao kofikola.
Ova ti kutya okaana ita ka kala vali ka manguluka shaashi keshe umwe ota kala eshi kutya oka kwatwa onghonga kuxe.
Omuhongifikola umwe okwa weda po ta ti osha fimana opo okaana ka twale kofikola imwe po.