ONGWEDIVAS – ǀAweǁguigu ge a ǀhawe-ūhe, hû ǂnû!khaide ūhâ ǂkhari autode ǀariǂuis !aroma, ǁîdi a !norasa-o!nâ ti hâ !gaesendi xu ra !huise. !Nakaǂnôa Direkteri !Nari!oabadi tsî ǁGaragu !âb dib, Ministeris Sîsengu tsî !Narixūn dib, Damien Mabenganob ge nēsa ǂhanusi ǁkhowa-ams !nona tsēde ge !khōǂgā hâ i sîsenǁareǁkhāǁkhāsens dis tawa ge mî. Nē sîsenǁareǁkhāǁkhāsens ge ǀhûhâsiba !nariǀhao-aon ase !narixūna sîsenūs !ādi !nâs xa gere !gû. ǀHûhâsigu khoena hōhō!nâs Daogu !Nari!oabadi ǂHanumā-aoǁguib ǀHûhâsib Khoen Sîsenūs ase hâb tsî ǁîb !naka nî sîsenxa ǁGaragu ǂnamipe. “Nausas nē ǂkhari-autode !nari!oabadi ǂharugub !nâ sîsenūsa ǂguin !aroma marisihōǂgās  ase ī, xawe da tā nî ǀuru !khais ge nē autodi khoena !narimā-ūs !aroma !norasa tama hâ !khaisa. ǁNā autodi ge kaise !haese ra !narihe, ǁaupexa haka !nāde tsēs !nâ gaxu kilometerga ra !nari-ūhe, sâ-i ose, tsîs ge nēsa ra !aroma !nari-aogu ra tsau !khaisa tsî tsūke!gâna !aromasa,” tib ge Mabenganoba ge mî. Ai!âb ge mîs ge “Sida ge nēsi !âǀhuru-aon tsî ǂhanugu nî !gôa!gâhe !khaisa ra mûǂam mâisan  ǀkha ǁgamǁaredi !nâ hâ, in ¬ǁîna ǀhûhâsigu khoen ǁga ǂoa tsî ǁkhāǁkhākhâide mā tsî ǁkhāti ǁgui!āba nēsa xu ra !hui mâsigu ǂnamipe.” ǀGui ǂhanuǁgui mâisab ǁîb tsîn nē sîsenǁareǁkhāǁkhāsens !nâ ge !â ib, ge nē aoǁguiba !khō!gâ tsî gere mî, nē hû khoena ra !nao ǂkhari autodi !nari-aogu ǁae tamase ra !narisa. ”Sada daogu ge ǀnai ǂgui ǁōga ra !aroma !nari-aon xa ǀoahâ tsî di ge autodi hîa daob ai hâs !aroma ǂâuǀoa tama hâde noxopa ǁōb !gôaga nēs ai ra ǀaro,” tib ge ge mî. ǁÎb ge dī aoǁguib ge, în !gae-auto !nari-aona ǀhao tsî ǀhûǁ¬are hâse ǂkhari bēga ǁama tsî ǂharugub !nâ ǂgâ tsî ǁnā ǀgaub !nâ ai!gû. Mabenganob noxopa ge mîs ge, !narihao-aon ûigu nē !nari-aogu ǂâidi !nâ ǀkhais ǀkhāsa ī, xawegu hōǂgās ai ǀgui ǂâide ra ǂnûisa. Shuuteni Kamatib, ǁ¬îb tsîn nē !oabadi !nâ mâb ge mâisana !khâikhom tsî gere mîba in nēn mâ-ū ǀawede ǀûs ǀguisa di. “Sida ge !âs tsî sîsenosiba ra !kham!oa; ǂhanub ge sîsenosiba ra ǂnuwiba.” Silas Petrusi, ǀnîhâ !nari-aob tsîn ge Kamatiba gere ǀhû!khō-am.