Auleria Wakudumo

Omulumenhu omunyasha oo a fiya po ofikola molwaashi a nyengwa kofuto okwa kufa onghatu opo a longe oilonga yokomake oyo paife hai mu etele oyuuyemo.

George Edgar (29) omukalimowomOngwediva, okwa eta po ongeshefa yokunduluka omitwe deembete, eesikopa, okuhandeka omatyofa, naikwao ihapu. Eshi okwe shi ninga konima vati a dopa nokunyengwa okufuta oilongwa koUnam oko a li te lihongele oulongi.

Omunyasha ou okwa hokolola kutya okwa li a tambulilwa koshiputudilo shopombada koUnam mo2017 oko a li te lihongele eifano lomavalulo (statistics), ashike mo2018 okwa lundulukila kouhongi. Okwa li nee vati a fininikwa a fiye po ofikola shaashi ka li e na oshimaliwa shokuliutila oilongwa imwe oyo a li a dopa.

Ta hokolola kutya okwa kala nokulipula kutya ekwafo laye otali mu dilile peni, fiyo a ninga etokolo lokuwaimina omumwainamati oo a kala noku mu longa oilonga aishe yokomake.

Vati oinima oya ka enda nawa eshi oCovid-19 ya tameka eshi Edgar a tokola opo a tote ongeshefa yaye yedina Couch NA. Osha li shidjuu kuye shaashi ka li e na oilongifomwa ya wana po, ashike eshi inashi mu shololifa. Okwa twikila ashike okungeshefa nokuulika oilonga yaye komapandja okomalungula ngaashi oFacebook, WhatsApp, Instagram oo e mu kwafela okumona ovalandi vahapu.

Nena Couch NA oku na omashina okuxwikila haa longo kolusheno naamwe ihaa longo kolusheno, oo haa kwafa opo va fike peenhele opo pehe na olusheno.

Edgar ota ti okwa kuta ovanailonga vavali. Omunailonga umwe oku li a mana ofikola ndele ina mona natango oilonga oyo e lihongela, omanga omunailonga umwe okaume kaye va putuka pamwe naye. Ta ti kaume kaye oo okwa li ashike ha kombo omidingililo domaumbo mOngwediva, paife okwe mu pa oilonga.

Ongeshefa yavo ohai dulu okunduluka po nokufitika oipumbiwa aishe yomomaumbo. Couch NA oha dulu okulonga e li monhele yavo yoilonga ya shaama noPandu Guest House ile ve uye konhele yoye mwene.

Kakele koilonga yokomake, Couch NA oha yandje yoo omadeulo koshiwana, ha longo ovanhu okunduluka, okufitika nokulonga oinima aishe ngaashi eesikopa, omitwe deembete, ousikopa voiyaxa nosho tuu.

Nonande a li a twa ofikola okati, Edgar osho a shuna kofikola, paife oku li modula ya xuuninwa koUnam. Okwa ti onghalo paife oi li xwepo, noha mono ngaho oyuuyemo okulikwafela eemhumbwe daye nokufuta ofikola. Ota ti elalakano laye okukala e na Couch NA e lihanena oshilongo ashishe.

Ota indile koshiwana shi kale hashi lande kovalongi vokomake moshilongo opo va yambidide eengeshefa domoshilongo.

-wakudumoauleria@gmail.com