RUACANA- Konyara vatungimo wokusika ko 100 vatunga pevango olyo nomvhura 40 ngesi vana nyoka kutundapo kukwama mbudi ezi vana kuvapa wondango zodoropa. Awo kuna kutanta asi yimaliwa eyi vana kuvatumbwidira asi yiyo navavapa morwa evhu lyawo kapi yina kuliza nevhu olyo vana weke. Ntani awo kuna kurundira kansela asi awo kurugana maumbondo gomanzi.
‘’ Ose kapi tuna hafa nampili nakauke. Nompitisili detu kurugana ufuki. Ngesi awo kuna kututarerera ntani kuna kutuvaka moyineya. Awo kapi avatupakere sinka ose. Ose kuvahorowora vatukarerepo. Makura awo yiyo nye vana kuyatuvaka kupitira momagano gawo gahana divilisa. Ame nayidiva ntani nayidiva eyi nakuhuyunga,’’ yimo ana kutanta foromani gwaOkarano Iipinge Shilongo. Age katente asi sinzi somavango oku akugwanene mema vagapata, morwa kapi atufutu ntani mema ogo ndiro. Shilongo katente asi age kapi gadiva asi morwa sinke ndango zagusira mema gawo, pwanare ngatugagwana kwaNamwater. ‘’ Sinzi setu vakurupe. Ose kutupura masere goyimaliwa momukunda. Ngapi ngapi omu ava tura yifutwa yawo? awo kuna kulya unene,’’ yimo ana kutanta. Kapi yina wapa, kwato ogu nayitambura.
Awo kwatutumbwidira asi tavatufutu yimaliwa yoyisesu kuna kara tupu N$300 kasimbashu ano eguma lyene N$10000. Ruacana CEO Malakia Ileka katente asi Okonyota, ngesi kuna kuvahundira vatundepo pevhu awo valikulike.
‘’Nampili vakansela vaturemo vafaturure kovatungimo, vahepa kutulisapo noveta nkarapamwe.awo kuna kunyoka kugusa yimaliwa. Awo vana kara vanaliwapayikire mokutunda pevango vagave mpito kekuliko. ‘’ Vakansela kapi ava tarurura mulyo gevhu, nye eyi kuyirugana kupitira moministeli zevhu makura ose tatufutu kukwama eyi zina gava ministeli. Ose ngesi kuna kugava nye yitundwamo koministeli asi yinke nayikahoroka, makura tundindire vatu pe nkumbu,’’ yimo ana kutanta.
Posiruwo nye oso mukurona godoropa Ruacana, Linda Mbwale katente asi kapisi nkenye ogu ana kara momukunda nayimuguma yekuliko. ‘’ Apa ngesi, kapi nanivhura kutanta asi vatungimo ava kupi natuvadirwira, nye kapi nayikara asi ure unene nopo vana kara ngesi,’’ yimo ana kutanta.
Age katente asi vatungimo vana tokora asi tavakara pevango, vahepa kugwana evhu olyo kondango anonye ava navapira kuyisikisamo, vahepa nye kuvatwara kopeke. Apa nye ngesi, evhu kapi lina kara asi tuliwapayike, makura ngesi kuna hara magano twaromo gomawa. Okonyota gumwe gwawo Maria Shivute katente katente asi aw okapi navatambura yimaliwa yoyisesu, eyi ngano vana hara wondango asi yiyo navavapa.
‘’ Nsene vana hara kutugusapo, vahepa kututwara kevango oku kuna kara mema norutjeno eli lyakara asi nare valiwapukurura ngwendi moomu tupu gakara mavango gomodoropa. Yimo ngoso ana kuyinkondopeka.
-vkaapanda@nepc.com.na