…Ovashingi veetaksi tava longelwa ominyonena kovatwaalelwa

OSHAKATI – Opolifi moshitukulwa shaShana oya kumaida ovashingi veetaksi opo va kale va kotoka ngeenge tava londeke ovanhu, unene ovalumenhu efimbo loufiku. 

Otaku hokololwa kutya ovalumenhu tave liufana ovatwaalelwa ove lininga oungudu tava nyeke ovashingi veetaksi omaliko avo. Omupopiliko wopolifi moshitukulwa shaShana Inspector Frieda Shikole okwa hokolola ta ti ovashingi veetaksi paife ova ninga unene oihakanwa, tava nyekwa eetuwa davo. Oshivike sha dja ko omushingi wotaksi weedula 35 okwa dengwa nokutuwa nombele kovalumenhu vane efimbo loufiku. Opolifi oya hokolola tai ti ovafekelwa ova lefa otaksi okudja mOngwediva tava ti kutya ova uka kOkandjengedi. Otaku hokololwa kutya umwe womovafekelwa okwa lombwela omushingi kutya otava ka pitula ovatwaalelwa ve li vavali pOkandjengedi.

Nakushininga oshihakanwa eshi a fika okwa kanghameka otuwa yaye a teelela ovatwaalelwa ovo a lombwelawa ta pitula. Okudja opo umwe womufekelwa okwa nukila omushingi ndele ta mu pondo.

Opolifi oya ti ovafekelwa ova shinga po otuwa yomulumenhu ou va yuka moixwa omo va kanghameka otuwa nokonima umwe okwa kufa ondjebo ndele te mu ningile omatilifa edipao tava pula oimaliwa.

Ponhele opo ovafekelwa va ya ova ka hanga po ovalumenhu ve li vavali. Ovafekelwa ova kufa ko oitopolwa kotuwa mwa kwatelwa omalola, eeshapi dotuwa noshoyo oshimaliwa sheeN$700. Nakuniga oshihakanwa okwa ya koshipangelo molwaashi okwa monifwa oshiponga. Ovafekelwa ova kwatwa po konima eshi oshiwana sha longela kumwe nopolifi.

-fhamalwa@nepc.com.na