Charles Ndeumane
ONGWEDIVA – Omulumentu gumwe okwa hulitha oshiwike shaza ko mOshakati sho anuwa yo pamwe naashingithi yomomapandaanda ooyakwao ya ponokelwa kongangala dhoka dhemu tsu nombele.
Omupopiliko gwopolisi moshitukulwa shaShana Warrant Officer Frieda Shikole okwa hokolola Aakwashigwana yAngola haya landitha uulityaatya nomihaka oya ponokelwa kaalumentu yane yahomata, ya adhika taya ende mekango lyi li popepi nolukanda lwOmutoni mOshakati. Oshiningwanima shoka osha ningwa mEtine pokati kotundi onti-18h00 no19h00.
Oonakuponokolwa mbaka yatatu, anuwa oya kambadhala oku igamena kookalyamupombo ihe gumwe okwa tsuwa nombele noya yugwa wo uulityaatya woN$1400 oshowo oN$600 koomuma.
Shikole ta ti naku ninga oshihakanwa okwa hulitha oshinano oshishona oku za pehala lyoshiningwanima, pethimbo ookuume ke ya li taye mu yambindhindha ye ke mu kongele ekwatho.
Ookume ka nakusa mboka a li nayo pethimbo lyoshiningwanima oyo Haidula Joronimu omunamimvo 28 a za kOmuvandje oshowo Ngudi Shindele omunamimvo 31 a za kOnehoni, koAangola. Nakusa ina tseyithwa natango oshoka aakwanezimo lye ina ya lombelwa. Aafekelwa anuwa oya fadhuka po ya thinda molukanda lwaOshoopala, na sigo oompaka inaya kwatwa. Omakonakono gopolisi ota ga tsikile.
Okatoo
Moshiningwanima shuulingingi oku pitila komalungula omunamvimvo 78 omukalimo gwomOmutsegwonime moshitopolwa shaShikoto okwa tulwa mokatoo pangodhi noku kengelelwa oshimaliwa shoN$40,320.
Oshiningwanima shoka osha ningwa pokati komasiku 20 nomasiku 22 Juuli nuumvo. Shi ikolelela kolopota yopolisi omufekelwa okwi ipopi onga Andreas Mushelenga omunambelewa gwaMTC. Anuwa okwa lombwele naku ninga oshihakanwa kutya okwa sindana oshimaliwa koMTC nokwe mu lombwele shoka ena oku ninga kongodhi ye yopeke opo a mone oshimaliwa she shoka a sindana.
Pethimbo ya li ta ya popi mongodhi omukengeleli okwa kala noku gandja omalombwelo kunakuninga oshihakanwa sigo a latha ko oN$40,320 komayalulilo ge gombaanga.
Shika osha kolekwa ku Inspector Shikole ngoka a ti oshipotha shoka osha ningilwa moshitopolwa shaShikoto ashike opolisi moshitopolwa moka oye shi gandja momake gopolisi yomoshitopolwa shaShana. Shikole okwa ti omufekelwa ina kwatwa natango, nomakonakono gopolisi ota ga tsikile.