Auleria Wakudumo
Ominista youmauyelele nomakwatafano opaungoba Emma Theofelus okwa indila ovakwashiwana va wanifa po oinakuwanifwa yokuhoolola ashike natango inave li shangifa oukalata vomahoololo opo veshi ninge.
Omashango omahoololo opaupelesidente neumbolopashiwana oo otaa ka kala ko muNovemba neudo otaa xulu oshivike eshi.
Theofelus okwa ti omahoololo okwa fimana koshilongo sha manguluka ngaashi Namibia, shaashi ohaa pitike ovanhu ovo va fika okuhoolola va kufe ombinga moudemokoli paku tokola kutya olye va hala a lele oshilongo meedula nhano di li komesho.
“Ohandi tu omukumo keshe umwe a fika nokuna oipumbiwa aishe, opo a talele po onhele yomalishangifilo omahoololo opo a ka dule oku kufa ombinga momahoololo ta eya,” ta kunghilile.
Okomisi yomahoololo mo 22 Juli 2024 oya holola kutya ovanhu eepelesenta 71% ovo ashike ve li shangifa oku kufa ombinga momahoololo ta e uya. Omanga eepelesenta 29% vati inadi li shangifa natango.
Epangelo natango ota li tu omukumo oshiwana shi kale sha pashuka, shi kufe ombinga noukeka noku li humbata nawa pefimbo lomahoololo odula ei.
“Omahoololo etu ohaa ningwa konima yeedula 5 alushe. Omanga oiwana yayooloka i na omaliudo opapolitika a yooloka, kape na nande oumwe a ha nyonene mukwao oufemba waye, ohole netumba loshilongo shetu osho tu hole atushe,” Theofelus tati.